kuchh tujhse shikayat mue be-pir nahin hai

kuchh tujh se shikāyat muue be-pīr nahīñ hai

qismat kī ḳhatā hai tirī taqsīr nahīñ hai

kāġhaz nahīñ likkhā koī tahrīr nahīñ hai

kyoñ niklūñ tire baap kī jāgīr nahīñ hai

misrī yuuñ hī biktī hai zarā chakh ke to dekho

ye piich hai chāval kī ajī khiir nahīñ hai

vo chāñdnī phir lā ke havāle mire kar deñ

aisī to ujāgar mirī taqdīr nahīñ hai

ik jaan se do jaan to honī nahīñ hargiz

yā maiñ nahīñ yā ab tirī ham-shīr nahīñ hai

sonā bhī jo chhūtī huuñ to ho jaatā hai miTTī

iksīr bhī mere liye iksīr nahīñ hai

ye saas muī chāhe jo kuchh un se lagā.e

is meñ to mirī koī bhī taqsīr nahīñ hai

khānā koī kyā haath se phir apne nikāle

Doī nahīñ chamcha nahīñ kaf-gīr nahīñ hai

beTī nahīñ detī tumheñ detī huuñ maiñ lauñDī

daulat nahīñ rakhtī koī jāgīr nahīñ hai

vo tauq to rakh aa.e the pahle hī juue meñ

ab dekhtī huuñ aaj to zanjīr nahīñ hai

'shaidā' ko zabāñ-dānī kī kuchh daad to miltī

afsos ki is vaqt buā 'mīr' nahīñ hai

kuchh tujh se shikayat mue be-pir nahin hai

qismat ki KHata hai teri taqsir nahin hai

kaghaz nahin likkha koi tahrir nahin hai

kyon niklun tere bap ki jagir nahin hai

misri yun hi bikti hai zara chakh ke to dekho

ye pich hai chawal ki aji khir nahin hai

wo chandni phir la ke hawale mere kar den

aisi to ujagar meri taqdir nahin hai

ek jaan se do jaan to honi nahin hargiz

ya main nahin ya ab teri ham-shir nahin hai

sona bhi jo chhuti hun to ho jata hai miTTi

iksir bhi mere liye iksir nahin hai

ye sas mui chahe jo kuchh un se lagae

is mein to meri koi bhi taqsir nahin hai

khana koi kya hath se phir apne nikale

Doi nahin chamcha nahin kaf-gir nahin hai

beTi nahin deti tumhein deti hun main launDi

daulat nahin rakhti koi jagir nahin hai

wo tauq to rakh aae the pahle hi jue mein

ab dekhti hun aaj to zanjir nahin hai

'shaida' ko zaban-dani ki kuchh dad to milti

afsos ki is waqt bua 'mir' nahin hai