kunDi baja ke is liye bhaga nahin hun main

kunDī bajā ke is liye bhāgā nahīñ huuñ maiñ

dikhtā nahīñ kisī ko to sochā nahīñ huuñ maiñ

pichhle baras kī baat hai kuchh log aa.e the

dastak sunī to kamre se chīḳhā nahīñ huuñ maiñ

jaane maiñ kis kā jism huuñ aur kis ke paas huuñ

DhūñDā hai ḳhud ko har jagah miltā nahīñ huuñ maiñ

le jaao mujh ko mujh se magar ek baat hai

lambe safar ke vāste achchhā nahīñ huuñ maiñ

saayā huuñ aur din Dhale bujh-vujh gayā huuñ kyā

dekhā hai aaj aa.ina dikhtā nahīñ huuñ maiñ

nāḳhun chubho ke bhāñp lo mujh meñ mirā vajūd

kitnā huuñ apne-āp meñ kitnā nahīñ huuñ maiñ

mumkin hai ye malāl tumheñ bhī fareb de

jaisā mujhe banāyā thā vaisā nahīñ huuñ maiñ

ik ik dukāñ se pūchhā ki maiñ dastiyāb huuñ

inkār sun ke bujh gayā achchhā nahīñ huuñ maiñ

kunDi baja ke is liye bhaga nahin hun main

dikhta nahin kisi ko to socha nahin hun main

pichhle baras ki baat hai kuchh log aae the

dastak suni to kamre se chiKHa nahin hun main

jaane main kis ka jism hun aur kis ke pas hun

DhunDa hai KHud ko har jagah milta nahin hun main

le jao mujh ko mujh se magar ek baat hai

lambe safar ke waste achchha nahin hun main

saya hun aur din Dhale bujh-wujh gaya hun kya

dekha hai aaj aaina dikhta nahin hun main

naKHun chubho ke bhanp lo mujh mein mera wajud

kitna hun apne-ap mein kitna nahin hun main

mumkin hai ye malal tumhein bhi fareb de

jaisa mujhe banaya tha waisa nahin hun main

ek ek dukan se puchha ki main dastiyab hun

inkar sun ke bujh gaya achchha nahin hun main