kunj-e-hairat se chale dasht-e-ziyan tak lae

kunj-e-hairat se chale dasht-e-ziyāñ tak laa.e

kaun lā saktā hai ham dil ko jahāñ tak laa.e

ek hangāma bapā hai pas-e-dīvār-e-badan

hai kise tāb-e-suḳhan kaun zabāñ tak laa.e

Thiik hai chashm-e-taġhāful ye tirī den sahī

taab zaḳhmoñ kī magar koī kahāñ tak laa.e

aañkh vīrāñ thī kisī dasht-e-tapāñ kī sūrat

ham ise silsila-e-āb-e-ravāñ tak laa.e

chal nikaltī hai to phir lab pe bhī aa jaatī hai

laane vaale kī ye marzī hai jahāñ tak laa.e

'ain-mumkin hai Thahar jaa.e sazā-vār-e-karam

ham yahī soch ke dil kū-e-butāñ tak laa.e

tujh ko jo chāhiye be-ḳhauf-o-ḳhatar letā jā

kaun kāfir hai ki jo dil meñ gumāñ tak laa.e

kunj-e-hairat se chale dasht-e-ziyan tak lae

kaun la sakta hai hum dil ko jahan tak lae

ek hangama bapa hai pas-e-diwar-e-badan

hai kise tab-e-suKHan kaun zaban tak lae

Thik hai chashm-e-taghaful ye teri den sahi

tab zaKHmon ki magar koi kahan tak lae

aankh viran thi kisi dasht-e-tapan ki surat

hum ise silsila-e-ab-e-rawan tak lae

chal nikalti hai to phir lab pe bhi aa jati hai

lane wale ki ye marzi hai jahan tak lae

'ain-mumkin hai Thahar jae saza-war-e-karam

hum yahi soch ke dil ku-e-butan tak lae

tujh ko jo chahiye be-KHauf-o-KHatar leta ja

kaun kafir hai ki jo dil mein guman tak lae