kushta-e-naz-e-dil-ruba hain hum

kushta-e-nāz-e-dil-rubā haiñ ham

zaḳhmī-e-ḳhanjar-e-adā haiñ ham

kyā kaheñ tum se ham ki kyā haiñ ham

maz.har-e-nūr-e-kibriyā haiñ ham

aap par jab se mubtalā haiñ ham

ḳhvesh-o-begāne se judā haiñ ham

aap haiñ apne husn par shaidā

aap apne hī par fidā haiñ ham

donoñ aalam se kuchh nahīñ matlab

kūcha-e-yār ke gadā haiñ ham

go ba-zāhir haiñ sūrat-e-ādam

fil-haqīqat ḳhudā-numā haiñ ham

bas 'qamar' itnā iftiḳhār hameñ

yaar ke naqsh-e-kafsh-e-pā haiñ ham

kushta-e-naz-e-dil-ruba hain hum

zaKHmi-e-KHanjar-e-ada hain hum

kya kahen tum se hum ki kya hain hum

mazhar-e-nur-e-kibriya hain hum

aap par jab se mubtala hain hum

KHwesh-o-begane se juda hain hum

aap hain apne husn par shaida

aap apne hi par fida hain hum

donon aalam se kuchh nahin matlab

kucha-e-yar ke gada hain hum

go ba-zahir hain surat-e-adam

fil-haqiqat KHuda-numa hain hum

bas 'qamar' itna iftiKHar hamein

yar ke naqsh-e-kafsh-e-pa hain hum