ku-ba-ku ishq mein aawara-o-ruswa hun main

kū-ba-kū ishq meñ āvāra-o-rusvā huuñ maiñ

ab mirā haal to ye hai ki tamāshā huuñ maiñ

ruḳhsat ai pās-e-adab al-madad ai jur.at-e-ishq

aaj āmāda-e-iz.hār-e-tamannā huuñ maiñ

koī mahfil koī aalam ho jahāñ aap nahīñ

mujh ko mahsūs ye hotā hai ki tanhā huuñ maiñ

tum ko ehsās nahīñ ik mirī ġham-ḳhvārī kā

mujh ko dekho ki sharīk-e-ġham-e-duniyā huuñ maiñ

naġhma-e-shauq jo sunñā ho to mizrāb uThā

chheḌ kar dekh ki ik sāz-e-tamannā huuñ maiñ

ek ujḌe hue ghar kā sā diyā huuñ ya.anī

jab kabhī koī jalātā hai to jaltā huuñ maiñ

ku-ba-ku ishq mein aawara-o-ruswa hun main

ab mera haal to ye hai ki tamasha hun main

ruKHsat ai pas-e-adab al-madad ai jurat-e-ishq

aaj aamada-e-izhaar-e-tamanna hun main

koi mahfil koi aalam ho jahan aap nahin

mujh ko mahsus ye hota hai ki tanha hun main

tum ko ehsas nahin ek meri gham-KHwari ka

mujh ko dekho ki sharik-e-gham-e-duniya hun main

naghma-e-shauq jo sunna ho to mizrab uTha

chheD kar dekh ki ek saz-e-tamanna hun main

ek ujDe hue ghar ka sa diya hun yani

jab kabhi koi jalata hai to jalta hun main