kya aa ke jahan mein kar gae hum

kyā aa ke jahāñ meñ kar ga.e ham

ik daaġh jigar pe dhar ga.e ham

mehmān-e-jahāñ the ek shab ke

shaam aa.e the aur sahar ga.e ham

juuñ sham.a tamām umr ro.e

har bazm se chashm-e-tar ga.e ham

apnī hī nazar nahīñ vagarna

tū hī thā udhar jidhar ga.e ham

naale meñ asar to kyuuñ na hotā

par terā lihāz kar ga.e ham

ham jānte haiñ ki tū hai ham meñ

go DhūñDne dar-ba-dar ga.e ham

jhagḌā thā jo dil pe us ko chhoḌā

kuchh soch ke sulh kar ga.e ham

is dasht ke ḳhār-o-ḳhas se bach kar

joñ bād-e-subuk guzar ga.e ham

thiiñ lutf se dil meñ jur.ateñ kuchh

par tere ġhazab se Dar ga.e ham

hasrat hī se ham bane the goyā

aañkh uThte hī uThte mar ga.e ham

derīna rafīq thā 'qalaq' haa.e

vo kyā hī muā ki mar ga.e ham

kya aa ke jahan mein kar gae hum

ek dagh jigar pe dhar gae hum

mehman-e-jahan the ek shab ke

sham aae the aur sahar gae hum

jun shama tamam umr roe

har bazm se chashm-e-tar gae hum

apni hi nazar nahin wagarna

tu hi tha udhar jidhar gae hum

nale mein asar to kyun na hota

par tera lihaz kar gae hum

hum jaante hain ki tu hai hum mein

go DhunDne dar-ba-dar gae hum

jhagDa tha jo dil pe us ko chhoDa

kuchh soch ke sulh kar gae hum

is dasht ke KHar-o-KHas se bach kar

jon baad-e-subuk guzar gae hum

thin lutf se dil mein juraten kuchh

par tere ghazab se Dar gae hum

hasrat hi se hum bane the goya

aankh uThte hi uThte mar gae hum

derina rafiq tha 'qalaq' hae

wo kya hi mua ki mar gae hum