kya baat thi ki jo bhi suna an-suna hua

kyā baat thī ki jo bhī sunā an-sunā huā

dil ke nagar meñ shor thā kaisā machā huā

tum chhup ga.e the jism kī dīvār se pare

ik shaḳhs phir rahā thā tumheñ DhūñDtā huā

ik saaya kal milā thā tire ghar ke ās-pās

hairān khoyā khoyā sā kuchh sochtā huā

shāyad havā-e-tāza kabhī aa.e is taraf

rakkhā hai maiñ ne ghar kā darīcha khulā huā

bhaTkā huā ḳhayāl huuñ vaadī meñ zehn kī

alfāz ke nagar kā pata pūchhtā huā

chāhā thā maiñ ne jab bhī hadoñ ko phalāñgnā

dekhā thā aage aage ufuq dauḌtā huā

chhiTkī huī thī chāñdnī yādoñ kī shab ko 'rāz'

āñgan mire ḳhayāl kā thā chauñktā huā

kya baat thi ki jo bhi suna an-suna hua

dil ke nagar mein shor tha kaisa macha hua

tum chhup gae the jism ki diwar se pare

ek shaKHs phir raha tha tumhein DhunDta hua

ek saya kal mila tha tere ghar ke aas-pas

hairan khoya khoya sa kuchh sochta hua

shayad hawa-e-taza kabhi aae is taraf

rakkha hai main ne ghar ka daricha khula hua

bhaTka hua KHayal hun wadi mein zehn ki

alfaz ke nagar ka pata puchhta hua

chaha tha main ne jab bhi hadon ko phalangna

dekha tha aage aage ufuq dauDta hua

chhiTki hui thi chandni yaadon ki shab ko 'raaz'

aangan mere KHayal ka tha chaunkta hua