kya bache dil jaan-lewa us ka har andaz hai

kyā bache dil jān-levā us kā har andāz hai

ġhamza hai ishva hai shoḳhī hai adā hai naaz hai

mahfil-e-ishrat meñ merā dil navā-pardāz hai

nāla-e-hasrat mirā goyā sadā-e-sāz hai

tauba bhī kar leñge ham jab vaqt us kā aa.egā

hazrat-e-vā.iz dar-e-tauba abhī to baaz hai

hogī phir be-e'tinā.ī hai abhī to iltifāt

phir vahī anjām hogā phir vahī āġhāz hai

dekh to is but ko zāhid aur kah īmān se

terī hūroñ meñ ye ra.anā.ī hai ye andāz hai

dil jigar chhid jaate haiñ aur kuchh ḳhabar hotī nahīñ

vo nigāh-e-nāz goyā tīr-e-be-āvāz hai

merī hastī ik muamma hai jise samjhā na maiñ

yā ḳhudā ye bhī tirī qudrat kā koī raaz hai

dar qafas kā khol de sayyād itmīnān se

tere said-e-shauq ko kab ḳhvāhish-e-parvāz hai

sun ke merā qissa-e-ġham un kā kahnā naaz se

vaah kyā tarz-e-bayāñ hai vaah kyā andāz hai

dil lagāte hī mujhe laale paḌe haiñ jaan ke

us kā kyā anjām hogā jis kā ye āġhāz hai

haa.e 'nashtar' vo mirā hamdard dil ġham-ḳhvār dil

ab kahāñ hai ham-nashīñ koī kahāñ hamrāz hai

kya bache dil jaan-lewa us ka har andaz hai

ghamza hai ishwa hai shoKHi hai ada hai naz hai

mahfil-e-ishrat mein mera dil nawa-pardaz hai

nala-e-hasrat mera goya sada-e-saz hai

tauba bhi kar lenge hum jab waqt us ka aaega

hazrat-e-waiz dar-e-tauba abhi to baz hai

hogi phir be-e'tinai hai abhi to iltifat

phir wahi anjam hoga phir wahi aaghaz hai

dekh to is but ko zahid aur kah iman se

teri huron mein ye ranai hai ye andaz hai

dil jigar chhid jate hain aur kuchh KHabar hoti nahin

wo nigah-e-naz goya tir-e-be-awaz hai

meri hasti ek muamma hai jise samjha na main

ya KHuda ye bhi teri qudrat ka koi raaz hai

dar qafas ka khol de sayyaad itminan se

tere said-e-shauq ko kab KHwahish-e-parwaz hai

sun ke mera qissa-e-gham un ka kahna naz se

wah kya tarz-e-bayan hai wah kya andaz hai

dil lagate hi mujhe lale paDe hain jaan ke

us ka kya anjam hoga jis ka ye aaghaz hai

hae 'nashtar' wo mera hamdard dil gham-KHwar dil

ab kahan hai ham-nashin koi kahan hamraaz hai