kyā batā.ūñ dil kahāñ hai aur kis jā dard hai
maiñ sarāpā dil huuñ dil merā sarāpā dard hai
ye samajh leñ pahle aap ai hazrat-e-īsā zarā
kis ke dil meñ dard hai ye aur kis kā dard hai
jo chalā duniyā se vo rakkhe hue siine pe haath
maiñ samajhtā huuñ ki sab ke dil meñ terā dard hai
mere chup rahne se to ġhāfil hai o zāhir-parast
zarf bhī utnā hī maiñ rakhtā huuñ jitnā dard hai
har taḌap par qālib-e-murda meñ aa jaatī hai ruuh
mujh marīz-e-nā-tavāñ kī jaan goyā dard hai
bach ga.e to intihā-e-ishq meñ lutf aa.egā
aur abhī to ibtidā meñ intihā kā dard hai
apnā apnā haal kah lene do 'nātiq' sab ko tum
jāntā hai vo ki kis ke dil meñ kitnā dard hai
kya bataun dil kahan hai aur kis ja dard hai
main sarapa dil hun dil mera sarapa dard hai
ye samajh len pahle aap ai hazrat-e-isa zara
kis ke dil mein dard hai ye aur kis ka dard hai
jo chala duniya se wo rakkhe hue sine pe hath
main samajhta hun ki sab ke dil mein tera dard hai
mere chup rahne se to ghafil hai o zahir-parast
zarf bhi utna hi main rakhta hun jitna dard hai
har taDap par qalib-e-murda mein aa jati hai ruh
mujh mariz-e-na-tawan ki jaan goya dard hai
bach gae to intiha-e-ishq mein lutf aaega
aur abhi to ibtida mein intiha ka dard hai
apna apna haal kah lene do 'natiq' sab ko tum
jaanta hai wo ki kis ke dil mein kitna dard hai
Source :
- Book : Noquush (Pg. B-315 E-331)
-
Publication : Nuqoosh Press Lahore
(May June 1954)
- Edition : May June 1954
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.