kya bataun tumhein ki kya hun main

kyā batā.ūñ tumheñ ki kyā huuñ maiñ

bhar chuke zaḳhm kī davā huuñ maiñ

jis kī ḳhvāhish hī gumrahī Thahrī

ḳhvāhishoñ kā vo qāfila huuñ maiñ

kyoñ mujhe gher kar ke baiThe ho

ai ġhamo aadmī burā huuñ maiñ

ye jo badnām ḳhat haiñ in kā hī

log kahte haiñ hāshiya huuñ maiñ

āḳhirī harf huuñ tabassum kā

aur ashkoñ kī ibtidā huuñ maiñ

ye mirī zindagī batā.egī

kitnī qistoñ meñ kab marā huuñ maiñ

aaj kī shaam ghar na lauTūñgā

sub.h aksar ye sochtā huuñ maiñ

saarī duniyā ko hai ḳhayāl mirā

kis taġhāful kā silsila huuñ maiñ

jis kī ḳhud kī hī koī Thor nahīñ

ek aisā hī aasrā huuñ maiñ

vo jo chīḳhoñ meñ ho ga.ī tabdīl

gūñgī bahrī vahī sadā huuñ maiñ

us kā lahja akhar rahā hai kyoñ

kyā use chāhne lagā huuñ maiñ

jab se ammāñ ne ruḳhsatī lī hai

chāñd ko pahroñ dekhtā huuñ maiñ

kyoñ hai ujḌā huā mirā 'sāhil'

kis samundar kī badduā huuñ maiñ

kya bataun tumhein ki kya hun main

bhar chuke zaKHm ki dawa hun main

jis ki KHwahish hi gumrahi Thahri

KHwahishon ka wo qafila hun main

kyon mujhe gher kar ke baiThe ho

ai ghamo aadmi bura hun main

ye jo badnam KHat hain in ka hi

log kahte hain hashiya hun main

aaKHiri harf hun tabassum ka

aur ashkon ki ibtida hun main

ye meri zindagi bataegi

kitni qiston mein kab mara hun main

aaj ki sham ghar na lauTunga

subh aksar ye sochta hun main

sari duniya ko hai KHayal mera

kis taghaful ka silsila hun main

jis ki KHud ki hi koi Thor nahin

ek aisa hi aasra hun main

wo jo chiKHon mein ho gai tabdil

gungi bahri wahi sada hun main

us ka lahja akhar raha hai kyon

kya use chahne laga hun main

jab se amman ne ruKHsati li hai

chand ko pahron dekhta hun main

kyon hai ujDa hua mera 'sahil'

kis samundar ki baddua hun main