kya chaak kiya tu ne meri jaan mere dil ko

kyā chaak kiyā tū ne mirī jaañ mire dil ko

merā hī banāyā hai garebāñ mire dil ko

tujh ko hai qasam dard-e-mohabbat mire dil kī

tū chain na denā kisī unvāñ mire dil ko

yā us but-e-gumrāh ko lā rāh-e-vafā par

yā pher de ai gardish-e-daurāñ mire dil ko

achchhī kahī achchhā nahīñ kuchh dil kā lagānā

ye lag ga.ī ai nāseh-e-nādāñ mire dil ko

tāsīr dikhā jaa.e mohabbat to ajab kyā

siine se lagā aaj mirī jaañ mire dil ko

kuchh duur nahīñ but-kada-o-kā'ba samajh leñ

kāfir tirī āñkhoñ ko musalmāñ mire dil ko

hai lutf to ye tujh ko ho mahshar meñ bhī inkār

aur 'dāġh' kahe tū ne liyā haañ mire dil ko

kya chaak kiya tu ne meri jaan mere dil ko

mera hi banaya hai gareban mere dil ko

tujh ko hai qasam dard-e-mohabbat mere dil ki

tu chain na dena kisi unwan mere dil ko

ya us but-e-gumrah ko la rah-e-wafa par

ya pher de ai gardish-e-dauran mere dil ko

achchhi kahi achchha nahin kuchh dil ka lagana

ye lag gai ai naseh-e-nadan mere dil ko

tasir dikha jae mohabbat to ajab kya

sine se laga aaj meri jaan mere dil ko

kuchh dur nahin but-kada-o-ka'ba samajh len

kafir teri aankhon ko musalman mere dil ko

hai lutf to ye tujh ko ho mahshar mein bhi inkar

aur 'dagh' kahe tu ne liya han mere dil ko