kya DhunDte ho ab jaras-e-raftagan ki dhul

kyā DhūñDte ho ab jaras-e-raftagāñ kī dhuul

ik kārvāñ ke saath ga.ī kārvāñ kī dhuul

kal tak the merā qāfila ham jis ke dosto

anjām-e-kār ab haiñ usī kārvāñ kī dhuul

madfan tirī galī meñ banāne chale to haiñ

ye āñdhiyāñ batā.eñgī ham haiñ kahāñ kī dhuul

rah meñ ye kaun ābla-pāyān-e-shauq haiñ

muḌ muḌ ke dekhtī hai jinheñ kārvāñ kī dhuul

larzāñ haiñ bām-o-dar pe ga.ī mahfiloñ ke saa.e

āñkhoñ meñ uḌ rahī hai dayār-e-butāñ kī dhuul

kaise tumhārī pyaas bujhā.eñ musāfiro

ham to haiñ ek chashma-e-reg-e-ravāñ kī dhuul

dāman meñ kaun bāñdhe 'musavvir' hameñ yahāñ

gard-e-mazār ham na kisī āstāñ kī dhuul

kya DhunDte ho ab jaras-e-raftagan ki dhul

ek karwan ke sath gai karwan ki dhul

kal tak the mera qafila hum jis ke dosto

anjam-e-kar ab hain usi karwan ki dhul

madfan teri gali mein banane chale to hain

ye aandhiyan bataengi hum hain kahan ki dhul

rah mein ye kaun aabla-payan-e-shauq hain

muD muD ke dekhti hai jinhen karwan ki dhul

larzan hain baam-o-dar pe gai mahfilon ke sae

aankhon mein uD rahi hai dayar-e-butan ki dhul

kaise tumhaari pyas bujhaen musafiro

hum to hain ek chashma-e-reg-e-rawan ki dhul

daman mein kaun bandhe 'musawwir' hamein yahan

gard-e-mazar hum na kisi aastan ki dhul