kya fikr jo dushman hain mere yar ghazal ke

kyā fikr jo dushman haiñ mire yaar ġhazal ke

maddāh bhī mil jā.eñge do chaar ġhazal ke

uslūb ke tūfān meñ mazmūn kī kashtī

allāh utāregā mujhe paar ġhazal ke

tūfān ho siine meñ magar lab pe ḳhamoshī

hazrāt yahī hote haiñ āsār ġhazal ke

duniyā kī 'ināyat ho ki ho terī navāzish

ḳhālī nahīñ jaate haiñ kabhī vaar ġhazal ke

donoñ meñ haqīqat meñ koī farq nahīñ hai

hote haiñ suḳhan-fahm taraf-dār ġhazal ke

alfāz ke alfāz ma'ānī ke ma'ānī

hushiyār baḌe hote haiñ fankār ġhazal ke

vo 'mīr' kā uslūb vo 'ġhālib' kā salīqa

pahle na the andāz dil-āzār ġhazal ke

vo bahr-o-qavāfī vo radīfeñ vo zamīneñ

dilchasp baḌe hote haiñ kirdār ġhazal ke

sau-bār ye sochā ki bas ab nazm likheñge

chakkar meñ magar aa ga.e har baar ġhazal ke

bāzār meñ har shaḳhs qasīde kā talabgār

ham haiñ ki liye phirte haiñ ash'ār ġhazal ke

kya fikr jo dushman hain mere yar ghazal ke

maddah bhi mil jaenge do chaar ghazal ke

uslub ke tufan mein mazmun ki kashti

allah utarega mujhe par ghazal ke

tufan ho sine mein magar lab pe KHamoshi

hazraat yahi hote hain aasar ghazal ke

duniya ki 'inayat ho ki ho teri nawazish

KHali nahin jate hain kabhi war ghazal ke

donon mein haqiqat mein koi farq nahin hai

hote hain suKHan-fahm taraf-dar ghazal ke

alfaz ke alfaz ma'ani ke ma'ani

hushiyar baDe hote hain fankar ghazal ke

wo 'mir' ka uslub wo 'ghaalib' ka saliqa

pahle na the andaz dil-azar ghazal ke

wo bahr-o-qawafi wo radifen wo zaminen

dilchasp baDe hote hain kirdar ghazal ke

sau-bar ye socha ki bas ab nazm likhenge

chakkar mein magar aa gae har bar ghazal ke

bazar mein har shaKHs qaside ka talabgar

hum hain ki liye phirte hain ash'ar ghazal ke