kya gham hai agar be-sar-o-saman bahut hain

kyā ġham hai agar be-sar-o-sāmān bahut haiñ

is shahr meñ kirdār ke dhanvān bahut haiñ

chāho to taġhāful ke na.e tiir chalāo

TuuTe hue dil meñ abhī armān bahut haiñ

duzdīda-nigāhī ye hayā-bār tabassum

is bazm meñ luT jaane ke imkān bahut haiñ

kho jaa.eñ na ye gauhar-e-nāyāb-e-ġham-e-ishq

bāzār-e-mohabbat se ye anjān bahut haiñ

jo zaḳhm bhī tū ne diye taaza haiñ abhī tak

ai gardish-e-daurāñ tire ehsān bahut haiñ

tai karke zamāne meñ taraqqī ke manāzil

kyā baat hai ham log pareshān bahut haiñ

har daaġh siyāsat ke safedī meñ chhupā.e

ye rāh-numā sāhib-e-īmān bahut haiñ

be-ḳhauf siyāsat ke pas-e-parda haiñ mujrim

kyā bandisheñ qānūn kī be-jān bahut haiñ

ham hausla-sāmāñ hue kyā shiddat-e-ġham meñ

arbāb-e-jahāñ dekh ke hairān bahut haiñ

ab aslaha-sāzī pe hai tāqat kā tavāzun

ye fitna-o-shar ke liye sāmān bahut haiñ

barsoñ se 'tarab' rishtoñ pe jo barf jamī hai

ab us ke pighal jaane ke imkān bahut haiñ

kya gham hai agar be-sar-o-saman bahut hain

is shahr mein kirdar ke dhanwan bahut hain

chaho to taghaful ke nae tir chalao

TuTe hue dil mein abhi arman bahut hain

duzdida-nigahi ye haya-bar tabassum

is bazm mein luT jaane ke imkan bahut hain

kho jaen na ye gauhar-e-nayab-e-gham-e-ishq

bazar-e-mohabbat se ye anjaan bahut hain

jo zaKHm bhi tu ne diye taza hain abhi tak

ai gardish-e-dauran tere ehsan bahut hain

tai karke zamane mein taraqqi ke manazil

kya baat hai hum log pareshan bahut hain

har dagh siyasat ke safedi mein chhupae

ye rah-numa sahib-e-iman bahut hain

be-KHauf siyasat ke pas-e-parda hain mujrim

kya bandishen qanun ki be-jaan bahut hain

hum hausla-saman hue kya shiddat-e-gham mein

arbab-e-jahan dekh ke hairan bahut hain

ab aslaha-sazi pe hai taqat ka tawazun

ye fitna-o-shar ke liye saman bahut hain

barson se 'tarab' rishton pe jo barf jami hai

ab us ke pighal jaane ke imkan bahut hain