kya gham jo gham-e-dil ka mudawa nahin hota

kyā ġham jo ġham-e-dil kā mudāvā nahīñ hotā

ye rog hī aisā hai ki aisā nahīñ hotā

ho jaa.e to ho jaa.e alag baat vagarna

duniyā meñ koī shaḳhs bhī apnā nahīñ hotā

ab tujh se gila kyā kareñ ai gardish-e-daurāñ

har shaam kī qismat meñ saverā nahīñ hotā

kuchh ham bhī alag sochte ai talḳhī-e-hālāt

sochoñ pe agar jabr kā pahrā nahīñ hotā

har dāman-e-pur-chāk nahīñ dāman-e-yūsuf

har dast-e-rasā dast-e-zuleḳhā nahīñ hotā

jo shaḳhs vafādār ho māñ-bāp kā 'rehān'

vo shaḳhs kabhī dahr meñ rusvā nahīñ hotā

kya gham jo gham-e-dil ka mudawa nahin hota

ye rog hi aisa hai ki aisa nahin hota

ho jae to ho jae alag baat wagarna

duniya mein koi shaKHs bhi apna nahin hota

ab tujh se gila kya karen ai gardish-e-dauran

har sham ki qismat mein sawera nahin hota

kuchh hum bhi alag sochte ai talKHi-e-haalat

sochon pe agar jabr ka pahra nahin hota

har daman-e-pur-chaak nahin daman-e-yusuf

har dast-e-rasa dast-e-zuleKHa nahin hota

jo shaKHs wafadar ho man-bap ka 'rehan'

wo shaKHs kabhi dahr mein ruswa nahin hota