kya ghazab tu ne ye ai zauq-e-pasheman kar diya

kyā ġhazab tū ne ye ai zauq-e-pashemāñ kar diyā

merā aañsū un kī āñkhoñ se numāyāñ kar diyā

thā mujhe to ḳhair paiġhām-e-junūñ josh-e-bahār

gul pe kyā guzrī ki chaak us ne garebāñ kar diyā

ḳhanda-e-gul jalva-e-shabnam faroġh-e-māhtāb

maiñ ne jis manzar pe chāhā un ko uryāñ kar diyā

ye gul-e-ātish-ba-jāñ ye lāla-e-raushan-zamīr

ai nasīm-e-sub.h tū ne to charāġhāñ kar diyā

be-niyāz-e-mausam-e-gul thā mirā josh-e-junūñ

maiñ ne jis zarre ko Thukrāyā gulistāñ kar diyā

gar mirī jānib nazar uTThī zahe-qismat magar

tum ne ye kyā tiir sā juzv-e-rag-e-jāñ kar diyā

maiñ koī naqsh-e-kaf-e-pā thā sar-e-rāh-e-talab

aañkh abhī khulne na paa.ī thī ki hairāñ kar diyā

bil-yaqīñ laḳht-e-jigar apnā thā farzand-e-ḳhalīl

surḳh-rū dīda-e-tar hai hai ki qurbāñ kar diyā

sun rahā huuñ ġhunche ġhunche se anal-haq kī sadā

kyā mire dil ko ham-āġhosh-e-gulistāñ kar diyā

na.ara-e-rind-e-ḳharābātī na labbaik-e-haram

tū ne uTh kar bazm ko shahr-e-ḳhamoshāñ kar diyā

misl-e-gul maiñ to chaman meñ muskurāyā bhī nahīñ

phir mujhe kis jurm meñ tū ne pareshāñ kar diyā

haath bhī uThne na paayā thā Ba-hangām-e-junūñ

kahkashāñ ne hañs ke pesh apnā garebāñ kar diyā

shaam surma dar-gulū hai to sahar pamba-ba-gosh

kis jahāñ meñ 'faiz' ko tū ne ġhazal-ḳhvāñ kar diyā

kya ghazab tu ne ye ai zauq-e-pasheman kar diya

mera aansu un ki aankhon se numayan kar diya

tha mujhe to KHair paigham-e-junun josh-e-bahaar

gul pe kya guzri ki chaak us ne gareban kar diya

KHanda-e-gul jalwa-e-shabnam farogh-e-mahtab

main ne jis manzar pe chaha un ko uryan kar diya

ye gul-e-atish-ba-jaan ye lala-e-raushan-zamir

ai nasim-e-subh tu ne to charaghan kar diya

be-niyaz-e-mausam-e-gul tha mera josh-e-junun

main ne jis zarre ko Thukraya gulistan kar diya

gar meri jaanib nazar uTThi zahe-qismat magar

tum ne ye kya tir sa juzw-e-rag-e-jaan kar diya

main koi naqsh-e-kaf-e-pa tha sar-e-rah-e-talab

aankh abhi khulne na pai thi ki hairan kar diya

bil-yaqin laKHt-e-jigar apna tha farzand-e-KHalil

surKH-ru dida-e-tar hai hai ki qurban kar diya

sun raha hun ghunche ghunche se anal-haq ki sada

kya mere dil ko ham-aghosh-e-gulistan kar diya

nara-e-rind-e-KHarabaati na labbaik-e-haram

tu ne uTh kar bazm ko shahr-e-KHamoshan kar diya

misl-e-gul main to chaman mein muskuraya bhi nahin

phir mujhe kis jurm mein tu ne pareshan kar diya

hath bhi uThne na paya tha Ba-hangam-e-junun

kahkashan ne hans ke pesh apna gareban kar diya

sham surma dar-gulu hai to sahar pamba-ba-gosh

kis jahan mein 'faiz' ko tu ne ghazal-KHwan kar diya