kya hi tapta hai sulagta hai dhuan deta hai

kyā hī taptā hai sulagtā hai dhuāñ detā hai

hijr kī shaam to dil bāñdh samāñ detā hai

kaun kambaḳht na chāhegā nikalnā lekin

itnī mohlat hī tirā daam kahāñ detā hai

qaul to ek bhī puurā na huā ab dekhūñ

kyā dalīl us kī mirā sho.ala-bayāñ detā hai

tab-e-nāzuk pe guzartā hai garāñ to guzre

zeb vahshī ko yahī tarz-e-fuġhāñ detā hai

ḳhaas bandoñ ko pukāregā idhar to rizvāñ

dāvat-e-ām idhar shahr-e-butāñ detā hai

ek muddat se badan barf hai lekin ab tak

karvaTeñ dil ko koī soz nihāñ detā hai

nāznīñ paḌhte haiñ 'rāhīl' kī ġhazleñ kyā ḳhuub

daad har sher kī har pīr-o-javāñ detā hai

kya hi tapta hai sulagta hai dhuan deta hai

hijr ki sham to dil bandh saman deta hai

kaun kambaKHt na chahega nikalna lekin

itni mohlat hi tera dam kahan deta hai

qaul to ek bhi pura na hua ab dekhun

kya dalil us ki mera shoala-bayan deta hai

tab-e-nazuk pe guzarta hai garan to guzre

zeb wahshi ko yahi tarz-e-fughan deta hai

KHas bandon ko pukarega idhar to rizwan

dawat-e-am idhar shahr-e-butan deta hai

ek muddat se badan barf hai lekin ab tak

karwaTen dil ko koi soz nihan deta hai

naznin paDhte hain 'rahil' ki ghazlen kya KHub

dad har sher ki har pir-o-jawan deta hai