kya hua kyun hua kis liye kya KHabar jo hua so hua tu use bhul ja

kyā huā kyuuñ huā kis liye kyā ḳhabar jo huā so huā tū use bhuul jā

jaag kar raat bhar ho ga.ī hai sahar ab na ḳhud ko jalā tū use bhuul jā

kaun aayā yahāñ chal paḌīñ āñdhiyāñ kaun vīrān kar ke gayā gulsitāñ

kis ne rakh diiñ lab-e-gul pe chingāriyāñ ye kise hai pata tū use bhuul jā

raat kī baat thī phir sahar ho ga.ī vaqt chaltā rahā dopahar ho ga.ī

shaam aane ko hai raat chhāne ko hai bikhre sapne uThā tū use bhuul jā

ham-navā ham-safar mo'tabar rāhbar phir mileñge tujhe tū shurū' kar safar

kho gayā jo guhar aa.egā lauT kar apnī hastī banā tū use bhuul jā

sochnā hai tirā vo na tum ko milā sach to ye hai magar tū na us ko milā

us kī qismat meñ shāyad thī tishna-labī ho gayā jo ḳhafā tū use bhuul jā

ye tirā ḳhvāb hai kitnā nāyāb hai tere ruḳh par usī kī chaḌhī taab hai

ek ḳhurshīd hai ek mahtāb hai maan merā kahā tū use bhuul jā

dil meñ jo dard hai raah kī gard hai jhaaḌ de jo use vo baḌā mard hai

dekh le zindagī garm hai sard hai chhoḌ shikva-gila tū use bhuul jā

ghar se bāhar nikal karvaTeñ mat badal chal mire saath chal āñsuoñ meñ na Dhal

dekh le shāḳh par ek bhīgā kañval muskurāne lagā tū use bhuul jā

kya hua kyun hua kis liye kya KHabar jo hua so hua tu use bhul ja

jag kar raat bhar ho gai hai sahar ab na KHud ko jala tu use bhul ja

kaun aaya yahan chal paDin aandhiyan kaun viran kar ke gaya gulsitan

kis ne rakh din lab-e-gul pe chingariyan ye kise hai pata tu use bhul ja

raat ki baat thi phir sahar ho gai waqt chalta raha dopahar ho gai

sham aane ko hai raat chhane ko hai bikhre sapne uTha tu use bhul ja

ham-nawa ham-safar mo'tabar rahbar phir milenge tujhe tu shuru' kar safar

kho gaya jo guhar aaega lauT kar apni hasti bana tu use bhul ja

sochna hai tera wo na tum ko mila sach to ye hai magar tu na us ko mila

us ki qismat mein shayad thi tishna-labi ho gaya jo KHafa tu use bhul ja

ye tera KHwab hai kitna nayab hai tere ruKH par usi ki chaDhi tab hai

ek KHurshid hai ek mahtab hai man mera kaha tu use bhul ja

dil mein jo dard hai rah ki gard hai jhaD de jo use wo baDa mard hai

dekh le zindagi garm hai sard hai chhoD shikwa-gila tu use bhul ja

ghar se bahar nikal karwaTen mat badal chal mere sath chal aansuon mein na Dhal

dekh le shaKH par ek bhiga kanwal muskurane laga tu use bhul ja