kya hua rangini-e-subh-o-masa baqi nahin

kyā huā rañgīnī-e-sub.h-o-masā baaqī nahīñ

apne hī ghar meñ vo pahlī sī fazā baaqī nahīñ

ārzūoñ kā koī bhī silsila baaqī nahīñ

mas.ala ye hai ki koī mas.ala baaqī nahīñ

aa gayā hai ab savā neze pe dekho āftāb

apnā saaya bhī zamīñ par zer-e-pā baaqī nahīñ

manzileñ āvāz detī haiñ ki ham haiñ muntazir

qāfile vāloñ meñ lekin hausle baaqī nahīñ

be-mahābā us ke aane kā natīja ye huā

ā.ina-ḳhāne meñ koī aa.ina baaqī nahīñ

kitnī mashshāqī se us ne saaf do TukḌe kiye

jism meñ ab ek bhī tasma lagā baaqī nahīñ

ham to chhoḌ aa.e the gahre naqsh rāhoñ meñ 'habāb'

vā.e-hasrat ek bhī ab naqsh-e-pā baaqī nahīñ

kya hua rangini-e-subh-o-masa baqi nahin

apne hi ghar mein wo pahli si faza baqi nahin

aarzuon ka koi bhi silsila baqi nahin

masala ye hai ki koi masala baqi nahin

aa gaya hai ab sawa neze pe dekho aaftab

apna saya bhi zamin par zer-e-pa baqi nahin

manzilen aawaz deti hain ki hum hain muntazir

qafile walon mein lekin hausle baqi nahin

be-mahaba us ke aane ka natija ye hua

aaina-KHane mein koi aaina baqi nahin

kitni mashshaqi se us ne saf do TukDe kiye

jism mein ab ek bhi tasma laga baqi nahin

hum to chhoD aae the gahre naqsh rahon mein 'habab'

wae-hasrat ek bhi ab naqsh-e-pa baqi nahin