kya isko shikayat hai ki main kuchh nahin kahta

kyā is kī shikāyat hai ki maiñ kuchh nahīñ kahtā

kuchh to mujhe dahshat hai ki maiñ kuchh nahīñ kahtā

nāhaq kī ye hujjat hai ki maiñ kuchh nahīñ kahtā

merī to ye aadat hai ki meñ kuchh nahīñ kahtā

tum gāliyāñ dete ho har ik baat meñ dekho

merī ye sharāfat hai ki maiñ kuchh nahīñ kahtā

vo kahte haiñ mujh se ki ḳhatā par tire haq meñ

itnā hī ġhanīmat hai ki maiñ kuchh nahīñ kahtā

chāhūñ to abhī ġhair ko pahlū se uThā duuñ

par aap kī dahshat hai ki maiñ kuchh nahīñ kahtā

dekh ai but-e-kam-go tirī sohbat ke asar se

merī bhī ye ḳhaslat hai ki maiñ kuchh nahīñ kahtā

but ban gayā huuñ ik but-e-be-raham ke Dar se

varna mirī shāmat hai ki maiñ kuchh nahīñ kahtā

ahbāb ko saktā hai mirī kam-suḳhanī par

mujh ko bhī ye hairat hai ki maiñ kuchh nahīñ kahtā

ai jaan na pūchho mirī chup rahne kā kuchh haal

aisī hī aziyyat hai ki maiñ kuchh nahīñ kahtā

kahtā jo maiñ kuchh haal to hotā unheñ kuchh rahm

ye bhī mirī qismat hai ki maiñ kuchh nahīñ kahtā

kyā tum se kahūñ us but-e-tarrār ke aage

merī to ye sūrat hai ki maiñ kuchh nahīñ kahtā

ḳhāmosh huuñ mujrim kī tarah aap ke aage

goyā mujhe ḳhiffat hai ki maiñ kuchh nahīñ kahtā

jo dil pe guzar jaa.e guzar jaa.e 'shagufta'

par merī ye aadat hai ki maiñ kuchh nahīñ kahtā

kya is ki shikayat hai ki main kuchh nahin kahta

kuchh to mujhe dahshat hai ki main kuchh nahin kahta

nahaq ki ye hujjat hai ki main kuchh nahin kahta

meri to ye aadat hai ki mein kuchh nahin kahta

tum galiyan dete ho har ek baat mein dekho

meri ye sharafat hai ki main kuchh nahin kahta

wo kahte hain mujh se ki KHata par tere haq mein

itna hi ghanimat hai ki main kuchh nahin kahta

chahun to abhi ghair ko pahlu se uTha dun

par aap ki dahshat hai ki main kuchh nahin kahta

dekh ai but-e-kam-go teri sohbat ke asar se

meri bhi ye KHaslat hai ki main kuchh nahin kahta

but ban gaya hun ek but-e-be-raham ke Dar se

warna meri shamat hai ki main kuchh nahin kahta

ahbab ko sakta hai meri kam-suKHani par

mujh ko bhi ye hairat hai ki main kuchh nahin kahta

ai jaan na puchho meri chup rahne ka kuchh haal

aisi hi aziyyat hai ki main kuchh nahin kahta

kahta jo main kuchh haal to hota unhen kuchh rahm

ye bhi meri qismat hai ki main kuchh nahin kahta

kya tum se kahun us but-e-tarrar ke aage

meri to ye surat hai ki main kuchh nahin kahta

KHamosh hun mujrim ki tarah aap ke aage

goya mujhe KHiffat hai ki main kuchh nahin kahta

jo dil pe guzar jae guzar jae 'shagufta'

par meri ye aadat hai ki main kuchh nahin kahta