kya jaane kis KHayal mein kis ehtimal mein

kyā jaane kis ḳhayāl meñ kis ehtimāl meñ

do din mile the baañT diye māh-o-sāl meñ

sūraj ġhurūb hone lagā dekhte raho

manzar ye ḳhush-gavār bahut hai zavāl meñ

bas ek she'r par ye tamāshā ye hāo-hū

ye haal hai to aag lagā dūñgā hall meñ

gardan jhukā.e saath liye be-hisī kī soch

shāmil na ho sakūñgā kisī bheḌ-chāl meñ

shāyad isī kā naam global village hai

jaise ka.ī parind kisī ek jaal meñ

shādī se pahle jaise valīma kisī kā ho

is vaqt phañs gayā huuñ kuchh aise vabāl meñ

ye peḌ ye pahāḌ ye paude ye phuul phal

kyā kyā kamāl pesh hue haiñ misāl meñ

be-shak ḳhudā kā fazl-o-karam hai 'nishāt' par

hai munfarid kalām meñ yaktā kamāl meñ

kya jaane kis KHayal mein kis ehtimal mein

do din mile the banT diye mah-o-sal mein

suraj ghurub hone laga dekhte raho

manzar ye KHush-gawar bahut hai zawal mein

bas ek she'r par ye tamasha ye hao-hu

ye haal hai to aag laga dunga hall mein

gardan jhukae sath liye be-hisi ki soch

shamil na ho sakunga kisi bheD-chaal mein

shayad isi ka nam global willage hai

jaise kai parind kisi ek jal mein

shadi se pahle jaise walima kisi ka ho

is waqt phans gaya hun kuchh aise wabaal mein

ye peD ye pahaD ye paude ye phul phal

kya kya kamal pesh hue hain misal mein

be-shak KHuda ka fazl-o-karam hai 'nishat' par

hai munfarid kalam mein yakta kamal mein