kya kahen yaro kya kya hum par ishq KHarabi laya hai

kyā kaheñ yaaro kyā kyā ham par ishq ḳharābī laayā hai

aañkh se le kar dil tak jaise ik dhundalkā chhāyā hai

jaise dhanak ākāsh pe nikle bādal ke chhaT jaane par

yuuñ hī tere ġham meñ ro kar vaqt suhānā aayā hai

merī baat na sunñe vaale pūchh is se tū haal mirā

aañsū ek fasāna ban ke palkoñ par tharrāyā hai

biit ga.ī hai dil pe qayāmat lab pe shikāyat lā na sake

aap ko kyā ma.alūm ki ham ne jaan ke dhokā khāyā hai

merī ġhazal ke ā.īne meñ dekh ke apnā rang-e-jamāl

kis kis naaz se sar ko jhukā kar kyā kyā vo sharmāyā hai

raat hasīnoñ ke jamghaT meñ kyā kyā naaz ke phuul khile

sāz-e-tarab kī chheḌ se lekin aur bhī dil ghabrāyā hai

raah se terī haT jaane kā jab bhī ham ne ahd kiyā

ik ik naqsh-e-qadam ne uTh kar pahroñ hameñ samjhāyā hai

shāyad ab ke baar to un se sulh na ho is jang ke ba.ad

ab ke apne aap ko ham ne sanjīda sā paayā hai

aisī kyā thī tujh se shikāyat aisā kyā thā tujh se malāl

aaj tirī adnā sī ināyat dekh ke dil bhar aayā hai

kya kahen yaro kya kya hum par ishq KHarabi laya hai

aankh se le kar dil tak jaise ek dhundalka chhaya hai

jaise dhanak aakash pe nikle baadal ke chhaT jaane par

yun hi tere gham mein ro kar waqt suhana aaya hai

meri baat na sunne wale puchh is se tu haal mera

aansu ek fasana ban ke palkon par tharraya hai

bit gai hai dil pe qayamat lab pe shikayat la na sake

aap ko kya malum ki hum ne jaan ke dhoka khaya hai

meri ghazal ke aaine mein dekh ke apna rang-e-jamal

kis kis naz se sar ko jhuka kar kya kya wo sharmaya hai

raat hasinon ke jamghaT mein kya kya naz ke phul khile

saz-e-tarab ki chheD se lekin aur bhi dil ghabraya hai

rah se teri haT jaane ka jab bhi hum ne ahd kiya

ek ek naqsh-e-qadam ne uTh kar pahron hamein samjhaya hai

shayad ab ke bar to un se sulh na ho is jang ke baad

ab ke apne aap ko hum ne sanjida sa paya hai

aisi kya thi tujh se shikayat aisa kya tha tujh se malal

aaj teri adna si inayat dekh ke dil bhar aaya hai