kya kahin duniya mein hum insan ya haiwan the

kyā kahīñ duniyā meñ ham insān yā haivān the

ḳhaak the kyā the ġharaz ik aan ke mehmān the

kar rahe the apnā qabza ġhair kī imlāk par

ġhaur se dekhā to ham bhī saḳht be-īmān the

aur kī chīzeñ dabā rakhnā baḌī samjhī thī aql

chhīn liiñ jab us ne jab jaanā ki ham nādān the

ek din ik ustuḳhāñ uupar paḌā merā jo paañv

kyā kahūñ us dam mujhe ġhaflat meñ kyā kyā dhyān the

paañv paḌte hī ġharaz us ustuḳhāñ ne aah kī

aur kahā ġhāfil kabhī to ham bhī sāhab jaan the

dast-o-pā zaanū sar-o-gardan shikam pusht-o-kamar

dekhne ko āñkheñ aur sunñe kī ḳhātir kaan the

abrū-o-bīnī jabīñ naqsh-o-nigār-o-ḳhāl-o-ḳhat

la.al-o-marvārīd se behtar lab-o-dandān the

raat ko sone ko kyā kyā narm-o-nāzuk the palañg

baiThne ko din ke kyā kyā koThe aur dālān the

khul rahā thā rū-ba-rū jannat ke gulshan kā chaman

nāznīn mahbūb goyā huur aur ġhilmān the

lag rahā thā dil ka.ī chanchal parī-zādoñ ke saath

kuchh kisī se ahd the aur kuchh kahīñ paimān the

gul-badan aur gul-ezāroñ ke kināro bos se

kuchh nikālī thī havas kuchh aur bhī armān the

mach rahe the chahchahe aur uḌ rahe the qahqahe

sāqī-o-sāġhar surāhī phuul itr-o-pān the

ek hī chakkar diyā aisā ajal ne aan kar

jo na ham the aur na vo sab aish ke sāmān the

aisī bedardī se ham par paañv mat rakh ai 'nazīr'

o miyāñ terī tarah ham bhī kabhī insān the

kya kahin duniya mein hum insan ya haiwan the

KHak the kya the gharaz ek aan ke mehman the

kar rahe the apna qabza ghair ki imlak par

ghaur se dekha to hum bhi saKHt be-iman the

aur ki chizen daba rakhna baDi samjhi thi aql

chhin lin jab us ne jab jaana ki hum nadan the

ek din ek ustuKHan upar paDa mera jo panw

kya kahun us dam mujhe ghaflat mein kya kya dhyan the

panw paDte hi gharaz us ustuKHan ne aah ki

aur kaha ghafil kabhi to hum bhi sahab jaan the

dast-o-pa zanu sar-o-gardan shikam pusht-o-kamar

dekhne ko aankhen aur sunne ki KHatir kan the

abru-o-bini jabin naqsh-o-nigar-o-KHal-o-KHat

lal-o-marwarid se behtar lab-o-dandan the

raat ko sone ko kya kya narm-o-nazuk the palang

baiThne ko din ke kya kya koThe aur dalan the

khul raha tha ru-ba-ru jannat ke gulshan ka chaman

naznin mahbub goya hur aur ghilman the

lag raha tha dil kai chanchal pari-zadon ke sath

kuchh kisi se ahd the aur kuchh kahin paiman the

gul-badan aur gul-ezaron ke kinaro bos se

kuchh nikali thi hawas kuchh aur bhi arman the

mach rahe the chahchahe aur uD rahe the qahqahe

saqi-o-saghar surahi phul itr-o-pan the

ek hi chakkar diya aisa ajal ne aan kar

jo na hum the aur na wo sab aish ke saman the

aisi bedardi se hum par panw mat rakh ai 'nazir'

o miyan teri tarah hum bhi kabhi insan the