kya kahun dil to giraftar-e-bala hai ab tak

kyā kahūñ dil to giraftār-e-balā hai ab tak

kaun dushman hai jo is ghar meñ chhupā hai ab tak

kis ko ilzām duuñ ai baḳht-e-sitamgar tū batā

phuul de kar mujhe patthar hī milā hai ab tak

band hai bāb-e-ijābat to koī kyā māñge

ik mirā dast-e-duā hai ki uThā hai ab tak

kaun huuñ ye nahīñ ma.alūm magar huuñ maujūd

itnī hī baat kā idrāk huā hai ab tak

ḳhaar to ḳhaar hai kyoñ us ko uThāyā maiñ ne

apne hī dil kī muravvat se gila hai ab tak

ho ga.e mujh se judā saare rafīqān-e-safar

ik faqat dard hai pahlū se lagā hai ab tak

koī badlā nahīñ is daur-e-ḳhirad meñ 'ahmad'

ek maiñ huuñ ki jise pās-e-vafā hai ab tak

kya kahun dil to giraftar-e-bala hai ab tak

kaun dushman hai jo is ghar mein chhupa hai ab tak

kis ko ilzam dun ai baKHt-e-sitamgar tu bata

phul de kar mujhe patthar hi mila hai ab tak

band hai bab-e-ijabat to koi kya mange

ek mera dast-e-dua hai ki uTha hai ab tak

kaun hun ye nahin malum magar hun maujud

itni hi baat ka idrak hua hai ab tak

KHar to KHar hai kyon us ko uThaya main ne

apne hi dil ki murawwat se gila hai ab tak

ho gae mujh se juda sare rafiqan-e-safar

ek faqat dard hai pahlu se laga hai ab tak

koi badla nahin is daur-e-KHirad mein 'ahmad'

ek main hun ki jise pas-e-wafa hai ab tak