kyā kahūñ ġhuncha-e-gul nīm-dahāñ hai kuchh aur
lā-kalāmī hai vahāñ baat yahāñ hai kuchh aur
bujh ga.ī ātish-e-gul dekh tū ai dīda-e-tar
kyā sulagtā hai jo pahlū meñ dhuāñ hai kuchh aur
paanī us meñ se bhareñ is meñ gireñ yūsuf-e-dil
chashma-e-chāh-e-zaqan aur kuaañ hai kuchh aur
jīte-jī maut kā Dar ba.ad-e-fanā ḳhauf-e-azāb
juz ġham-o-rañj yahāñ hai na vahāñ hai kuchh aur
husn-e-sūrat pe na jā dekh vahīñ ma.anī ko
ek haiñ ka.aba-o-but-ḳhāna kahāñ hai kuchh aur
tum samajhte ho mirī be-zehnī meñ hai kalām
lab-e-goyā kī qasam zikr yahāñ hai kuchh aur
bāda-kash vo huuñ karūñ shīshe ke shīshe ḳhālī
par lagā.ūñ yahī raT nashshe meñ haañ hai kuchh aur
qismat-e-'shād' meñ juz ġham jo yahāñ kuchh bhī nahīñ
ai havas le chal udhar ko ki jahāñ hai kuchh aur
kya kahun ghuncha-e-gul nim-dahan hai kuchh aur
la-kalami hai wahan baat yahan hai kuchh aur
bujh gai aatish-e-gul dekh tu ai dida-e-tar
kya sulagta hai jo pahlu mein dhuan hai kuchh aur
pani us mein se bharen is mein giren yusuf-e-dil
chashma-e-chah-e-zaqan aur kuan hai kuchh aur
jite-ji maut ka Dar baad-e-fana KHauf-e-azab
juz gham-o-ranj yahan hai na wahan hai kuchh aur
husn-e-surat pe na ja dekh wahin mani ko
ek hain kaba-o-but-KHana kahan hai kuchh aur
tum samajhte ho meri be-zehni mein hai kalam
lab-e-goya ki qasam zikr yahan hai kuchh aur
baada-kash wo hun karun shishe ke shishe KHali
par lagaun yahi raT nashshe mein han hai kuchh aur
qismat-e-'shad' mein juz gham jo yahan kuchh bhi nahin
ai hawas le chal udhar ko ki jahan hai kuchh aur
Source:
Sukhan-e-Bemisal: Deewan-e-Shad (pdf) and website (Pg. p-41 e-47 pdf-47)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.