kya kahun kaise karishme dekhe

kyā kahūñ kaise karishme dekhe

maiñ ne āvāz ke saa.e dekhe

merī hijrat hī na likkhī ho kahīñ

maiñ ne ḳhvāboñ meñ parinde dekhe

terī āñkhoñ meñ the jugnū raqsāñ

apnī palkoñ pe sitāre dekhe

maiñ ne jaate hue dekhā tujh ko

tujh ko takte hue raste dekhe

jin kī palkoñ pe sahīfe utreñ

maiñ ne kuchh aise bhī chehre dekhe

vasl vāloñ kī aziyyat dekhī

hijr vāloñ ke salīqe dekhe

muskurāhaT nahīñ dekhī merī

tū ne bas paañv meñ chhāle dekhe

jis ne māthe pe rakhī hoñ āñkheñ

vo koī aadmī kaise dekhe

jis ne dekhā na ho darvesh 'safī'

vo mire ghar kabhī aa.e dekhe

kya kahun kaise karishme dekhe

main ne aawaz ke sae dekhe

meri hijrat hi na likkhi ho kahin

main ne KHwabon mein parinde dekhe

teri aankhon mein the jugnu raqsan

apni palkon pe sitare dekhe

main ne jate hue dekha tujh ko

tujh ko takte hue raste dekhe

jin ki palkon pe sahife utren

main ne kuchh aise bhi chehre dekhe

wasl walon ki aziyyat dekhi

hijr walon ke saliqe dekhe

muskurahaT nahin dekhi meri

tu ne bas panw mein chhaale dekhe

jis ne mathe pe rakhi hon aankhen

wo koi aadmi kaise dekhe

jis ne dekha na ho darwesh 'safi'

wo mere ghar kabhi aae dekhe