kya KHabar kab nind aae dida-e-be-KHwab mein

kyā ḳhabar kab niiñd aa.e dīda-e-be-ḳhvāb meñ

shaam se ham jal rahe haiñ sāya-e-mahtāb meñ

ab tumhārī yaad se paḌte haiñ yuuñ dil meñ bhañvar

jaise kankar pheñk de koī bhare tālāb meñ

jis galī meñ ghar tumhārā hai karo us kā ḳhayāl

ham to haiñ badnām apne halqa-e-ahbāb meñ

ahl-e-dil jaate the pahle sirf maqtal kī taraf

ḳhud-kushī bhī ab hai shāmil 'ishq ke ādāb meñ

yuuñ kisī kā pyaar āġhosh-e-havas meñ jā chhupā

koī lāsha jis tarah lipTā huā kam-ḳhāb meñ

rahmat-e-yazdāñ se māñgī ham ne do chhīñToñ kī bhiik

vo huā jal-thal ki bastī bah ga.ī sailāb meñ

gardish-e-daurāñ kī zad meñ yuuñ hai apnī zindagī

jaise chakrātī ho kashtī halqa-e-girdāb meñ

vādī-e-sarban meñ thiiñ jo mehrbāñ mujh par 'qatīl'

vo bahāreñ DhūñDhtī haiñ ab mujhe punjab meñ

kya KHabar kab nind aae dida-e-be-KHwab mein

sham se hum jal rahe hain saya-e-mahtab mein

ab tumhaari yaad se paDte hain yun dil mein bhanwar

jaise kankar phenk de koi bhare talab mein

jis gali mein ghar tumhaara hai karo us ka KHayal

hum to hain badnam apne halqa-e-ahbab mein

ahl-e-dil jate the pahle sirf maqtal ki taraf

KHud-kushi bhi ab hai shamil 'ishq ke aadab mein

yun kisi ka pyar aaghosh-e-hawas mein ja chhupa

koi lasha jis tarah lipTa hua kam-KHab mein

rahmat-e-yazdan se mangi hum ne do chhinTon ki bhik

wo hua jal-thal ki basti bah gai sailab mein

gardish-e-dauran ki zad mein yun hai apni zindagi

jaise chakraati ho kashti halqa-e-girdab mein

wadi-e-sarban mein thin jo mehrban mujh par 'qatil'

wo bahaaren DhunDhti hain ab mujhe punjab mein