kya KHabar thi ishq mein aisa bhi ek daur aae hai

kyā ḳhabar thī ishq meñ aisā bhī ik daur aa.e hai

baat kaisī saañs letā huuñ to jī ghabrā.e hai

rahm kar jazb-e-mohabbat ye sitam kyoñ Dhaa.e hai

husn aur betāb-o-hairāñ kis se dekhā jaa.e hai

yuuñ to un kī yaad se miltī hai taskīn-e-hayāt

aur jab taḌpā.e hai zālim bahut taḌpā.e hai

ḳhushk āñkheñ muskurāte hoñT chehra mutma.in

yuuñ bhī aksar dāstān-e-ġham sunā.ī jaa.e hai

aur to kyā zindagī kā hosh tak chhoḌā nahīñ

lūTne vaale kahīñ aise bhī luuTā jaa.e hai

rañg-e-gulshan dekhne vaale kabhī ye bhī to dekh

nannhī nannhī pattiyoñ meñ kaun ras dauḌāye hai

ishq ke maare hue duniyā ko dekheñ bhī to kyā

jab nazar uThtī hai koī sāmne aa jaa.e hai

husn chhuptā phir rahā hai muḳhtalif pardoñ meñ 'kaif'

ishq kī zālim nazar ke sāmne kaun aa.e hai

kya KHabar thi ishq mein aisa bhi ek daur aae hai

baat kaisi sans leta hun to ji ghabrae hai

rahm kar jazb-e-mohabbat ye sitam kyon Dhae hai

husn aur betab-o-hairan kis se dekha jae hai

yun to un ki yaad se milti hai taskin-e-hayat

aur jab taDpae hai zalim bahut taDpae hai

KHushk aankhen muskuraate honT chehra mutmain

yun bhi aksar dastan-e-gham sunai jae hai

aur to kya zindagi ka hosh tak chhoDa nahin

luTne wale kahin aise bhi luTa jae hai

rang-e-gulshan dekhne wale kabhi ye bhi to dekh

nannhi nannhi pattiyon mein kaun ras dauDaye hai

ishq ke mare hue duniya ko dekhen bhi to kya

jab nazar uThti hai koi samne aa jae hai

husn chhupta phir raha hai muKHtalif pardon mein 'kaif'

ishq ki zalim nazar ke samne kaun aae hai