kya KHabar thi ye mohabbat ka natija hoga

kyā ḳhabar thī ye mohabbat kā natīja hogā

rāt-din dard-e-judā.ī meñ taḌapnā hogā

yaar kī diid jo taqdīr meñ hogī hogī

yaar kā vasl muqaddar meñ jo hogā hogā

jaan to saikḌoñ kī tū ne nikālī hogī

magar armān kisī kā na nikālā hogā

mere rone pe ḳhushāmad se ye kahnā un kā

chup raho chup raho dekho koī rusvā hogā

huuñ vo mai-nosh na chūTegī sar-e-mahshar bhī

sāġhar ik haath meñ ik haath meñ miinā hogā

vaqt-e-ruḳhsat jo kahā maiñ ne miloge tum kab

kis sharārat se kahā hashr meñ milnā hogā

tum jise apnā samajhte ho use ai 'sābir'

kab huā hai vo kisī kā jo tumhārā hogā

kya KHabar thi ye mohabbat ka natija hoga

raat-din dard-e-judai mein taDapna hoga

yar ki did jo taqdir mein hogi hogi

yar ka wasl muqaddar mein jo hoga hoga

jaan to saikDon ki tu ne nikali hogi

magar arman kisi ka na nikala hoga

mere rone pe KHushamad se ye kahna un ka

chup raho chup raho dekho koi ruswa hoga

hun wo mai-nosh na chuTegi sar-e-mahshar bhi

saghar ek hath mein ek hath mein mina hoga

waqt-e-ruKHsat jo kaha main ne miloge tum kab

kis shararat se kaha hashr mein milna hoga

tum jise apna samajhte ho use ai 'sabir'

kab hua hai wo kisi ka jo tumhaara hoga