kya khojte hain mujh mein sar-e-sham hi charagh

kyā khojte haiñ mujh meñ sar-e-shām hī charāġh

kyoñ dekhte haiñ bāñdhe mujhe TikTikī charāġh

jaise kisī ko raushnī matlūb hī nahīñ

be-fikr ho ke so.e paḌe haiñ sabhī charāġh

qat.an jo ek pal bhī jale hī na the kabhī

ilzām dhar rahe haiñ havā par vahī charāġh

donoñ bane haiñ miTTī se phir aisā kyoñ nahīñ

ya.anī charāġh aadmī aur aadmī charāġh

maujūd huuñ maiñ phir bhī zarūrat nahīñ mirī

goyā ki ban ga.ī hai mirī zindagī charāġh

is ḳhaufnāk āñdhī kā jab tak pata chalā

tab tak hamāre hāthoñ se vo le uḌī charāġh

yuuñ Dar rahe ho is ko jalāne se tum 'alī'

jaise ki ye ho duniyā kā ik āḳhirī charāġh

kya khojte hain mujh mein sar-e-sham hi charagh

kyon dekhte hain bandhe mujhe TikTiki charagh

jaise kisi ko raushni matlub hi nahin

be-fikr ho ke soe paDe hain sabhi charagh

qatan jo ek pal bhi jale hi na the kabhi

ilzam dhar rahe hain hawa par wahi charagh

donon bane hain miTTi se phir aisa kyon nahin

yani charagh aadmi aur aadmi charagh

maujud hun main phir bhi zarurat nahin meri

goya ki ban gai hai meri zindagi charagh

is KHaufnak aandhi ka jab tak pata chala

tab tak hamare hathon se wo le uDi charagh

yun Dar rahe ho is ko jalane se tum 'ali'

jaise ki ye ho duniya ka ek aaKHiri charagh