kya kya log guzar jate hain rang-birangi caron mein

kyā kyā log guzar jaate haiñ rañg-birañgī caroñ meñ

dil ko thaam ke rah jaate haiñ dil vaale bāzāroñ meñ

ye be-dard zamāna ham se terā dard na chhīn sakā

ham ne dil kī baat kahī hai tīroñ meñ talvāroñ meñ

hoñToñ par aa.heñ kyuuñ hotīñ āñkheñ nis-din kyuuñ rotīñ

koī agar apnā bhī hotā ūñche ohde-dāroñ meñ

sadr-e-mahfil daad jise de daad usī ko miltī hai

haa.e kahāñ ham aan phañse haiñ zālim duniyā-dāroñ meñ

rahne ko ghar bhī mil jaatā chāk-e-jigar bhī sil jaatā

'jālib' tum bhī sher sunāte jā ke agar darbāroñ meñ

kya kya log guzar jate hain rang-birangi caron mein

dil ko tham ke rah jate hain dil wale bazaron mein

ye be-dard zamana hum se tera dard na chhin saka

hum ne dil ki baat kahi hai tiron mein talwaron mein

honTon par aahen kyun hotin aankhen nis-din kyun rotin

koi agar apna bhi hota unche ohde-daron mein

sadr-e-mahfil dad jise de dad usi ko milti hai

hae kahan hum aan phanse hain zalim duniya-daron mein

rahne ko ghar bhi mil jata chaak-e-jigar bhi sil jata

'jalib' tum bhi sher sunate ja ke agar darbaron mein