kya kya na kiya ishq mein kya kya na karenge

kyā kyā na kiyā ishq meñ kyā kyā na kareñge

lekin ġham-e-jānāñ tujhe rusvā na kareñge

dāman to bhigo deñge bahar-hāl mire ashk

maanā koī tūfān pa barpā na kareñge

is tark-e-tamannā meñ bhī shāmil hai tamanna

jab ye hai to phir tark-e-tamannā na kareñge

har chand sahī maslahat-e-vaqt magar ham

apnā sar-e-ḳhuddār jhukāyā na kareñge

chamkeñge vahī charḳh-e-mohabbat pe sitāre

jo gardish-e-aflāk kī parvā na kareñge

jo maañg ke laanī paḌeñ ġhairoñ ke chaman se

ham aisī bahāroñ kī tamanna na kareñge

badleñge vahī gardish-e-ayyām kī taqdīr

jo gardish-e-ayyām se badlā na kareñge

tūfāñ jo safīnoñ ko Dubo dete the aksar

kyā ab vo safīnoñ ko Duboyā na kareñge

kyoñ mashq-e-sitam ke liye aa.iin tarāsho

ham tum se kisī jaur kā shikvā na kareñge

kya kya na kiya ishq mein kya kya na karenge

lekin gham-e-jaanan tujhe ruswa na karenge

daman to bhigo denge bahar-haal mere ashk

mana koi tufan pa barpa na karenge

is tark-e-tamanna mein bhi shamil hai tamanna

jab ye hai to phir tark-e-tamanna na karenge

har chand sahi maslahat-e-waqt magar hum

apna sar-e-KHuddar jhukaya na karenge

chamkenge wahi charKH-e-mohabbat pe sitare

jo gardish-e-aflak ki parwa na karenge

jo mang ke lani paDen ghairon ke chaman se

hum aisi bahaaron ki tamanna na karenge

badlenge wahi gardish-e-ayyam ki taqdir

jo gardish-e-ayyam se badla na karenge

tufan jo safinon ko Dubo dete the aksar

kya ab wo safinon ko Duboya na karenge

kyon mashq-e-sitam ke liye aain tarasho

hum tum se kisi jaur ka shikwa na karenge