kya lutf zindagi ka jo nadaniyan na hon

kyā lutf zindagī kā jo nādāniyāñ na hoñ

siine meñ dil ho aur pareshāniyāñ na hoñ

tark-e-ta.alluqāt to karte ho dekhnā

tum ko ḳhudā-na-karda pashemāniyāñ na hoñ

ye saarī iztirāb-e-musalsal kī baat hai

dil ko sukūn ho to ġhazal-ḳhvāniyāñ na hoñ

zaḳhm-e-jigar ko apne chhupātā rahā huuñ maiñ

is ḳhauf se ki un ko pashemāniyāñ na hoñ

vo din guzar ga.e ki mohabbat gunāh thī

ab to mushāhidāt ko hairāniyāñ na hoñ

us dil pe soz-o-sāz-e-mohabbat harām hai

jis meñ nashāt-e-ġham kī farāvāniyāñ na hoñ

ai 'shauq' barq-o-bād kā is meñ qusūr kyā

qismat burī na ho to pareshāniyāñ na hoñ

kya lutf zindagi ka jo nadaniyan na hon

sine mein dil ho aur pareshaniyan na hon

tark-e-talluqat to karte ho dekhna

tum ko KHuda-na-karda pashemaniyan na hon

ye sari iztirab-e-musalsal ki baat hai

dil ko sukun ho to ghazal-KHwaniyan na hon

zaKHm-e-jigar ko apne chhupata raha hun main

is KHauf se ki un ko pashemaniyan na hon

wo din guzar gae ki mohabbat gunah thi

ab to mushahidat ko hairaniyan na hon

us dil pe soz-o-saz-e-mohabbat haram hai

jis mein nashat-e-gham ki farawaniyan na hon

ai 'shauq' barq-o-baad ka is mein qusur kya

qismat buri na ho to pareshaniyan na hon