kya lutf zindagi ka uThane lage hain log

kyā lutf zindagī kā uThāne lage haiñ log

din meñ bhī ab charāġh jalāne lage haiñ log

ā.īna zindagī ko dikhāne lage haiñ log

merī ġhazal ko sarqa batāne lage haiñ log

har jā pe zarf apnā dikhāne lage haiñ log

chādar se apnī paañv baḌhāne lage haiñ log

tārīḳh-e-nau nisāb meñ aa.ī hai is tarah

maazī ke saare naqsh miTāne lage haiñ log

dīvāngī kī had se bhī aage nikal ga.e

marhūm ko ḳhutūt likhāne lage haiñ log

amn-o-amāñ kī paidā ho is mulk meñ fazā

kyoñ nafratoñ ke peḌ ugāne lage haiñ log

aa.ī na raas jab unheñ shahroñ kī zindagī

sahrā kī samt dekhiye jaane lage haiñ log

ash.ār merī ġhazloñ ke chhūne lage haiñ dil

apne diloñ meñ mujh ko biThāne lage haiñ log

ye bhī to ai 'latīf' siyāsat kī den hai

sar par gadhoñ ke siiñg ugāne lage haiñ log

kya lutf zindagi ka uThane lage hain log

din mein bhi ab charagh jalane lage hain log

aaina zindagi ko dikhane lage hain log

meri ghazal ko sarqa batane lage hain log

har ja pe zarf apna dikhane lage hain log

chadar se apni panw baDhane lage hain log

tariKH-e-nau nisab mein aai hai is tarah

mazi ke sare naqsh miTane lage hain log

diwangi ki had se bhi aage nikal gae

marhum ko KHutut likhane lage hain log

amn-o-aman ki paida ho is mulk mein faza

kyon nafraton ke peD ugane lage hain log

aai na ras jab unhen shahron ki zindagi

sahra ki samt dekhiye jaane lage hain log

ashaar meri ghazlon ke chhune lage hain dil

apne dilon mein mujh ko biThane lage hain log

ye bhi to ai 'latif' siyasat ki den hai

sar par gadhon ke sing ugane lage hain log