kya main ek harf tha likha yun hi

kyā maiñ ik harf thā likhā yuuñ hī

merā honā bhī bas huā yuuñ hī

jāntī huuñ ki tum ko pyaar nahīñ

yuuñ hī mujh ko lagā lagā yuuñ hī

ik ḳhudā kī vo baat kartā thā

aur phir ho gayā ḳhudā yuuñ hī

kyā patā kab qubūl ho jaa.e

tū bhī to maañg liiñ duā yuuñ hī

ek ḳhadsha hai bahke qadmoñ se

DhūñD hī leñ na rāsta yuuñ hī

vo hamāre the aur ham un ke

aa ga.ī darmiyāñ anā yuuñ hī

tum ne jo kuchh kahā kahā yuuñ hī

maiñ ne bhī sun liyā sunā yuuñ hī

ek lamhe meñ dil huā un kā

ho gayā thā ye faisla yuuñ hī

kyā zarūrī hai manziloñ kā safar

tū bhī chal koī rāsta yuuñ hī

muḳhtasar sī hai dāstāñ 'mītā'

har koī bas jiyā jiyā yuuñ hī

kya main ek harf tha likha yun hi

mera hona bhi bas hua yun hi

jaanti hun ki tum ko pyar nahin

yun hi mujh ko laga laga yun hi

ek KHuda ki wo baat karta tha

aur phir ho gaya KHuda yun hi

kya pata kab qubul ho jae

tu bhi to mang lin dua yun hi

ek KHadsha hai bahke qadmon se

DhunD hi len na rasta yun hi

wo hamare the aur hum un ke

aa gai darmiyan ana yun hi

tum ne jo kuchh kaha kaha yun hi

main ne bhi sun liya suna yun hi

ek lamhe mein dil hua un ka

ho gaya tha ye faisla yun hi

kya zaruri hai manzilon ka safar

tu bhi chal koi rasta yun hi

muKHtasar si hai dastan 'mita'

har koi bas jiya jiya yun hi