kya pata kis jurm ki kis ko saza deta hun main

kyā patā kis jurm kī kis ko sazā detā huuñ maiñ

rañg sā ik bāñdhtā huuñ phir bhulā detā huuñ maiñ

apne aage ab to maiñ ḳhud bhī Thahar saktā nahīñ

sāmnā hote hī chuTkī meñ uḌā detā huuñ maiñ

mo.ajiza aglā to ab shāyad purānā ho chalā

dekhnā ab ke koī chakkar nayā detā huuñ maiñ

mujh se aage bhī nikal jaanā bahut mushkil nahīñ

āj-kal āhista-rau huuñ rāsta detā huuñ maiñ

shor sā uThtā hai aur uThte hī dab jaatā hai ab

harf sā likhne se pahle hī miTā detā huuñ maiñ

taaki merī sulh-jūī ko lage kuchh bhaav bhī

har na.e fitne ko dar-parda havā detā huuñ maiñ

baat bhī suntā nahīñ huuñ vasl meñ dil kī 'zafar'

aise ḳhar-mastoñ ko mahfil se uThā detā huuñ maiñ

kya pata kis jurm ki kis ko saza deta hun main

rang sa ek bandhta hun phir bhula deta hun main

apne aage ab to main KHud bhi Thahar sakta nahin

samna hote hi chuTki mein uDa deta hun main

moajiza agla to ab shayad purana ho chala

dekhna ab ke koi chakkar naya deta hun main

mujh se aage bhi nikal jaana bahut mushkil nahin

aaj-kal aahista-rau hun rasta deta hun main

shor sa uThta hai aur uThte hi dab jata hai ab

harf sa likhne se pahle hi miTa deta hun main

taki meri sulh-jui ko lage kuchh bhaw bhi

har nae fitne ko dar-parda hawa deta hun main

baat bhi sunta nahin hun wasl mein dil ki 'zafar'

aise KHar-maston ko mahfil se uTha deta hun main