kya rawish rakkhi hai phir aapne auron ke liye

kyā ravish rakkhī hai phir aap ne auroñ ke liye

gar yahī tarz-e-mulāqāt hai apnoñ ke liye

rasm-e-ulfat bhī agar aap ke ādāb meñ hai

to uThā rakkhī hai vo kaun se vaqtoñ ke liye

jaan kā rog banā lī jo mohabbat ham ne

ab vo sunte haiñ ki tafrīh hai logoñ ke liye

terī bāteñ ye tirā harf-e-tasallī jaise

sāmne rakh de khilaune koī bachchoñ ke liye

kabhī aalam thā ki har ḳhat thā tirā dīda-e-tar

rah ga.e ab to ye aurāq havāloñ ke liye

mere chehre pe ho kyuuñ rañg-e-shikāyat 'anjum'

mere dāman kā har ik taar hai yāroñ ke liye

kya rawish rakkhi hai phir aap ne auron ke liye

gar yahi tarz-e-mulaqat hai apnon ke liye

rasm-e-ulfat bhi agar aap ke aadab mein hai

to uTha rakkhi hai wo kaun se waqton ke liye

jaan ka rog bana li jo mohabbat hum ne

ab wo sunte hain ki tafrih hai logon ke liye

teri baaten ye tera harf-e-tasalli jaise

samne rakh de khilaune koi bachchon ke liye

kabhi aalam tha ki har KHat tha tera dida-e-tar

rah gae ab to ye auraq hawalon ke liye

mere chehre pe ho kyun rang-e-shikayat 'anjum'

mere daman ka har ek tar hai yaron ke liye