kyā satāte ho raho banda-navāz
ki nahīñ ḳhuub ye ḳhū banda-navāz
be-sabab be-vaj.h o be-taqsīr
is qadar ġhussa na ho banda-navāz
zulm nāhaq na karo koī din
jiyo aur jīvne do banda-navāz
mai-kasho biich na baiTho hargiz
ḳhuun merā na piyo banda-navāz
itr ko mal ke na aao ham paas
zab.h kartī hai ye bū banda-navāz
kab talak apnī kahe jāoge
baat merī bhī suno banda-navāz
vājib-ul-qatl tumhārā maiñ huuñ
aur kā naam na lo banda-navāz
go ki sab mujh ko burā kahte haiñ
tum zabāñ siiñ na kaho banda-navāz
kis kā muñh hai jo tire sanmukh ho
ho na ho ā.īna ho banda-navāz
jā tirī chashm meñ merī hai jā
sarv ho hai lab-e-jū banda-navāz
vasf-e-kākul meñ sadā goyā hai
jo zabāñ har sar-e-mū banda-navāz
dil se 'hātim' ba-ḳhudā banda hai
duur ḳhidmat se hai go banda-navāz
kya satate ho raho banda-nawaz
ki nahin KHub ye KHu banda-nawaz
be-sabab be-wajh o be-taqsir
is qadar ghussa na ho banda-nawaz
zulm nahaq na karo koi din
jiyo aur jiwne do banda-nawaz
mai-kasho bich na baiTho hargiz
KHun mera na piyo banda-nawaz
itr ko mal ke na aao hum pas
zabh karti hai ye bu banda-nawaz
kab talak apni kahe jaoge
baat meri bhi suno banda-nawaz
wajib-ul-qatl tumhaara main hun
aur ka nam na lo banda-nawaz
go ki sab mujh ko bura kahte hain
tum zaban sin na kaho banda-nawaz
kis ka munh hai jo tere sanmukh ho
ho na ho aaina ho banda-nawaz
ja teri chashm mein meri hai ja
sarw ho hai lab-e-ju banda-nawaz
wasf-e-kakul mein sada goya hai
jo zaban har sar-e-mu banda-nawaz
dil se 'hatim' ba-KHuda banda hai
dur KHidmat se hai go banda-nawaz
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
