kya shoKH-o-shang shai nigah-e-sharmgin bhi hai

kyā shoḳh-o-shañg shai nigah-e-sharmgīñ bhī hai

chilman se jhāñktī bhī hai chilman-nashīñ bhī hai

ġhunche shagūfe chhoḌne vaale haiñ anqarīb

is ahd-e-ḳhurd-bīñ meñ koī dūrbīñ bhī hai

apne mizāj hī ke ta.āqub meñ huuñ hanūz

farsh-e-sifāl bhī falak-e-chār meñ bhī hai

ham aap par na aap kareñ ham pe e'timād

dāman ke saath saath yahāñ āstīñ bhī hai

takiya karam pe kaise karūñ maiñ ki nāz-e-husn

nukta-navāz hai to sahī nukta-chīñ bhī hai

karte ho apne shahr ko kyā kyā malāmateñ

jis kī kamī hai jā ke to dekhūñ kahīñ bhī hai

detā hai aadmī ko sahārā qadam qadam

ik tā.if-ul-ḳhayāl jo hai bhī nahīñ bhī hai

rūposhī-e-sujūd meñ bhī niyyat-e-numūd

Tapkā kalañk kā mirā dāġh-e-jabīñ bhī hai

naql-e-vatan bhī kar ke kahāñ jā.iyegā aap

bandoñ kī zad pe ab to ḳhudā kī zamīñ bhī hai

apne ko kitne saañp se Dasvā rahe haiñ ham

mas.hūr haiñ ki vaqt kī nāgin hasīñ bhī hai

kyā aap jhuTpuTe ko bhī pahchānte nahīñ

dastī hai jo sabāh vo kyā rāstīñ bhī hai

jiinā idhar muhāl hai marnā udhar muhāl

zahrāb bhī vahī hai vahī añgbīñ bhī hai

ham tā.irān-e-arsh ko pīchhe se mat pukār

maazī kī yādgār to dīvār-e-chīñ bhī hai

shāyad janāb-e-nūh bhī hoñge gila-guzār

afsāna nā-tamām dam-e-vāpsīñ bhī hai

kya shoKH-o-shang shai nigah-e-sharmgin bhi hai

chilman se jhankti bhi hai chilman-nashin bhi hai

ghunche shagufe chhoDne wale hain anqarib

is ahd-e-KHurd-bin mein koi durbin bhi hai

apne mizaj hi ke taaqub mein hun hanuz

farsh-e-sifal bhi falak-e-chaar mein bhi hai

hum aap par na aap karen hum pe e'timad

daman ke sath sath yahan aastin bhi hai

takiya karam pe kaise karun main ki naz-e-husn

nukta-nawaz hai to sahi nukta-chin bhi hai

karte ho apne shahr ko kya kya malamaten

jis ki kami hai ja ke to dekhun kahin bhi hai

deta hai aadmi ko sahaara qadam qadam

ek taif-ul-KHayal jo hai bhi nahin bhi hai

ruposhi-e-sujud mein bhi niyyat-e-numud

Tapka kalank ka mera dagh-e-jabin bhi hai

naql-e-watan bhi kar ke kahan jaiyega aap

bandon ki zad pe ab to KHuda ki zamin bhi hai

apne ko kitne sanp se Daswa rahe hain hum

mashur hain ki waqt ki nagin hasin bhi hai

kya aap jhuTpuTe ko bhi pahchante nahin

dasti hai jo sabah wo kya rastin bhi hai

jina idhar muhaal hai marna udhar muhaal

zahrab bhi wahi hai wahi angbin bhi hai

hum tairan-e-arsh ko pichhe se mat pukar

mazi ki yaadgar to diwar-e-chin bhi hai

shayad janab-e-nuh bhi honge gila-guzar

afsana na-tamam dam-e-wapsin bhi hai