kya sunaun dil-e-muztar ka fasana tumko

kyā sunā.ūñ dil-e-muztar kā fasāna tum ko

maiñ ne chāhā thā kabhī ek zamāna tum ko

ye jo tum eid pe bhī aate nahīñ lauT ke ghar

koī chhuTTī kā nahīñ hotā bahāna tum ko

bistar-e-marg pe maañ thī to na the sāmne tum

bahut hī mahñgā paḌā hai chale jaanā tum ko

gaañv ke kachche makānoñ meñ ye pakke rishte

raas aa.egā nahīñ shahr kā khānā tum ko

har mahīne ye na.e note ye ḳhat kyā matlab

na manāo nahīñ aatā hai manānā tum ko

ek kamra hai kirā.e kā ye bāzārī ġhizā

shahr meñ kaise mile shāhī Thikāna tum ko

āḳhirī ḳhat ko paḌho us meñ milegā 'māham'

bhuul jaane kā use koī bahāna tum ko

kya sunaun dil-e-muztar ka fasana tum ko

main ne chaha tha kabhi ek zamana tum ko

ye jo tum eid pe bhi aate nahin lauT ke ghar

koi chhuTTi ka nahin hota bahana tum ko

bistar-e-marg pe man thi to na the samne tum

bahut hi mahnga paDa hai chale jaana tum ko

ganw ke kachche makanon mein ye pakke rishte

ras aaega nahin shahr ka khana tum ko

har mahine ye nae note ye KHat kya matlab

na manao nahin aata hai manana tum ko

ek kamra hai kirae ka ye bazari ghiza

shahr mein kaise mile shahi Thikana tum ko

aaKHiri KHat ko paDho us mein milega 'maham'

bhul jaane ka use koi bahana tum ko