kya tha azal se qabl batata nahin koi

kyā thā azal se qabl batātā nahīñ koī

ye dāstāñ shurūa se sunātā nahīñ koī

bātil har ek bazm meñ bālā-nashīn hai

haq ko ab apne paas biThātā nahīñ koī

sahrā hai koh-o-dasht haiñ vīrāñ mazār haiñ

jaa.e kahīñ bhī jis ko bulātā nahīñ koī

aate haiñ aate aate sab ādāb-e-āshiqī

dil ḳhud se sīkhtā hai sikhātā nahīñ koī

nāchīz se huzūr koī kaam hai zarūr

yuuñ muft meñ sharāb pilātā nahīñ koī

kis ko hai dost fursat-e-nāz-o-niyāz ab

rūTheñ kisī se kyā ki manātā nahīñ koī

raḳht-e-safar uThā 'sadā' jaanā hai ab vahāñ

vāpas jahāñ se lauT ke aatā nahīñ koī

kya tha azal se qabl batata nahin koi

ye dastan shurua se sunata nahin koi

baatil har ek bazm mein baala-nashin hai

haq ko ab apne pas biThata nahin koi

sahra hai koh-o-dasht hain viran mazar hain

jae kahin bhi jis ko bulata nahin koi

aate hain aate aate sab aadab-e-ashiqi

dil KHud se sikhta hai sikhata nahin koi

nachiz se huzur koi kaam hai zarur

yun muft mein sharab pilata nahin koi

kis ko hai dost fursat-e-naz-o-niyaz ab

ruThen kisi se kya ki manata nahin koi

raKHt-e-safar uTha 'sada' jaana hai ab wahan

wapas jahan se lauT ke aata nahin koi