kyā tum ko batā.ūñ ham-nafaso kyoñ zabt kā dāman chhoḌ diyā
siine meñ tapish kuchh aisī thī ik daaġh ko raushan chhoḌ diyā
ādāb-e-junūñ the pesh-e-nazar aur hosh thā itnā vahshat meñ
apnā jo garebāñ yaad aaya us shoḳh kā dāman chhoḌ diyā
tūfāñ kā guzar sayyād kā Dar kuchh bhī to na thā us māman meñ
kāñToñ kī talab hī thī shāyad ḳhud apnā nasheman chhoḌ diyā
kab tak maiñ rahīn-e-dard rahūñ kab tak mirā dāman chaak rahe
jab yaad baḌhī kuchh had se sivā to nāla-o-shevan chhoḌ diyā
ab zauq-e-asīrī us ko kaheñ yā kam-nigahī apnī 'manzar'
zanjīr nahīñ jab paañv meñ kyoñ kūcha-e-barzan chhoḌ diyā
hangām-e-bahārāñ hai shāyad pūchho to zarā kyoñ 'manzar' ne
yuuñ ābla-pā hone ke liye phir gosha-e-gulshan chhoḌ diyā
kya tum ko bataun ham-nafaso kyon zabt ka daman chhoD diya
sine mein tapish kuchh aisi thi ek dagh ko raushan chhoD diya
aadab-e-junun the pesh-e-nazar aur hosh tha itna wahshat mein
apna jo gareban yaad aaya us shoKH ka daman chhoD diya
tufan ka guzar sayyaad ka Dar kuchh bhi to na tha us maman mein
kanTon ki talab hi thi shayad KHud apna nasheman chhoD diya
kab tak main rahin-e-dard rahun kab tak mera daman chaak rahe
jab yaad baDhi kuchh had se siwa to nala-o-shewan chhoD diya
ab zauq-e-asiri us ko kahen ya kam-nigahi apni 'manzar'
zanjir nahin jab panw mein kyon kucha-e-barzan chhoD diya
hangam-e-bahaaran hai shayad puchho to zara kyon 'manzar' ne
yun aabla-pa hone ke liye phir gosha-e-gulshan chhoD diya
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.