kyon ho mamnun-e-qamar pur-nur paimane ki raat

kyoñ ho mamnūn-e-qamar pur-nūr paimāne kī raat

roz-e-raushan se bhī raushan-tar hai maiḳhāne kī raat

de rahā hai sāqī-e-rangīñ-adā bhar bhar ke jaam

Dhal rahī hai aaj paimānoñ meñ maiḳhāne kī raat

aap ke zulm-o-sitam duniyā ko aa jaate nazar

is qadar tārīk gar hotī na dīvāne kī raat

dekhtā hai jo guzar jaatā hai ye kahtā huā

yā ilāhī ḳhair se kaT jaa.e dīvāne kī raat

zulmatoñ meñ jab tumhāre zulm aa jaate haiñ yaad

aur bhī tārīk ho jaatī hai dīvāne kī raat

jā ke ābādī se phir vāpas koī aatā nahīñ

kis qadar hai pur-sukūñ sunsān vīrāne kī raat

le liyā tārīki-e-shab ne use āġhosh meñ

roz-e-raushan dekhne niklā thā dīvāne kī raat

baad murdan zulmat-e-marqad ne ye sābit kiyā

qabr tak hai saath dīvāne ke dīvāne kī raat

hoñ mukaddar jin ke dil hargiz na vo aa.eñ yahāñ

kīna-parvar ko na raas aa.egī maiḳhāne kī raat

aañkh mahrūm-e-tamāshā ho to donoñ ek haiñ

tuur kī vo raushnī ho yā ho dīvāne kī raat

duur bechainī huī paayā sukūñ niiñd aa ga.ī

sham.a ke qadmoñ se vābasta thī parvāne kī raat

'ja.afarī' bāloñ kī hai halkī safedī se ayaañ

sub.h kī manzil pe aa pahuñchī hai maiḳhāne kī raat

kyon ho mamnun-e-qamar pur-nur paimane ki raat

roz-e-raushan se bhi raushan-tar hai maiKHane ki raat

de raha hai saqi-e-rangin-ada bhar bhar ke jam

Dhal rahi hai aaj paimanon mein maiKHane ki raat

aap ke zulm-o-sitam duniya ko aa jate nazar

is qadar tarik gar hoti na diwane ki raat

dekhta hai jo guzar jata hai ye kahta hua

ya ilahi KHair se kaT jae diwane ki raat

zulmaton mein jab tumhaare zulm aa jate hain yaad

aur bhi tarik ho jati hai diwane ki raat

ja ke aabaadi se phir wapas koi aata nahin

kis qadar hai pur-sukun sunsan virane ki raat

le liya tariki-e-shab ne use aaghosh mein

roz-e-raushan dekhne nikla tha diwane ki raat

baad murdan zulmat-e-marqad ne ye sabit kiya

qabr tak hai sath diwane ke diwane ki raat

hon mukaddar jin ke dil hargiz na wo aaen yahan

kina-parwar ko na ras aaegi maiKHane ki raat

aankh mahrum-e-tamasha ho to donon ek hain

tur ki wo raushni ho ya ho diwane ki raat

dur bechaini hui paya sukun nind aa gai

shama ke qadmon se wabasta thi parwane ki raat

'jafari' baalon ki hai halki safedi se ayan

subh ki manzil pe aa pahunchi hai maiKHane ki raat