kyon ho mujhse KHafa kaho to sahi

kyoñ ho mujh se ḳhafā kaho to sahī

kyā hai merī ḳhatā kaho to sahī

hañste hañste chhalak paḌīñ āñkheñ

kaun yaad aa gayā kaho to sahī

is qadar ham se barhamī kyoñ hai

kis ne kyā kah diyā kaho to sahī

shīsha-e-dil ko toḌ kar mere

aap ko kyā milā kaho to sahī

kis ne kis ko bhulā diyā āḳhir

kaun hai be-vafā kaho to sahī

jān-levā haiñ hijr ke lamhe

ab na hoñge judā kaho to sahī

kho.e kho.e se rahte ho 'ālam'

ye tumheñ kyā huā kaho to sahī

kyon ho mujh se KHafa kaho to sahi

kya hai meri KHata kaho to sahi

hanste hanste chhalak paDin aankhen

kaun yaad aa gaya kaho to sahi

is qadar hum se barhami kyon hai

kis ne kya kah diya kaho to sahi

shisha-e-dil ko toD kar mere

aap ko kya mila kaho to sahi

kis ne kis ko bhula diya aaKHir

kaun hai be-wafa kaho to sahi

jaan-lewa hain hijr ke lamhe

ab na honge juda kaho to sahi

khoe khoe se rahte ho 'alam'

ye tumhein kya hua kaho to sahi