kyon kahun main ki sitam ka main saza-war na tha

kyoñ kahūñ maiñ ki sitam kā maiñ sazā-vār na thā

dil diyā thā tujhe kis tarah gunahgār na thā

umr bhar mujh se thī har ek ko be-vaj.h ḳhalish

kyūñki maiñ gulshan-e-ālam meñ koī ḳhaar na thā

kyā na kuchh ho gayā ik ġhairat-e-yūsuf ke liye

kab mohabbat meñ maiñ rusvā sar-e-bāzār na thā

kyā ye kartā mire zaḳhm-e-jigar-o-dil kā ilaaj

charḳh-e-be-rahm koī marham-e-zañgār na thā

fard niklā fan-e-duzdī meñ ḳhayāl-e-dilbar

us kā aanā thā ki pahlū meñ dil-e-zār na thā

kyā bahaltā gul-o-sumbul se chaman meñ mirā dil

vo tirī zulf na thā ye tirā ruḳhsār na thā

apnī qismat hī kā shākī maiñ mohabbat meñ rahā

shikva-e-charḳh na thā kuchh gila-e-yār na thā

hashr ke roz mire husn-e-gunah kā yārab

terī rahmat ke sivā koī ḳharīdār na thā

terī āñkhoñ kī mohabbat kā faqat thā use rog

varna kuchh nargis-e-bīmār ko āzār na thā

tum ne mahfil meñ jagah dī use hasrat hai mujhe

ġhair is āv-bhagat kā to sazā-vār na thā

nargis us aañkh kī bīmār-e-gul us ruḳh pe nisār

bāġh-e-ālam meñ kise ishq kā āzār na thā

ho ga.ī rasm-e-mulāqāt chalo bahs hai kyā

tum ḳhatā par na the aur maiñ bhī vafādār na thā

do pyāloñ meñ hai saaqī ke ajab kaif 'fahīm'

āñkheñ milte hī vo thā kaun jo sarshār na thā

kyon kahun main ki sitam ka main saza-war na tha

dil diya tha tujhe kis tarah gunahgar na tha

umr bhar mujh se thi har ek ko be-wajh KHalish

kyunki main gulshan-e-alam mein koi KHar na tha

kya na kuchh ho gaya ek ghairat-e-yusuf ke liye

kab mohabbat mein main ruswa sar-e-bazar na tha

kya ye karta mere zaKHm-e-jigar-o-dil ka ilaj

charKH-e-be-rahm koi marham-e-zangar na tha

fard nikla fan-e-duzdi mein KHayal-e-dilbar

us ka aana tha ki pahlu mein dil-e-zar na tha

kya bahalta gul-o-sumbul se chaman mein mera dil

wo teri zulf na tha ye tera ruKHsar na tha

apni qismat hi ka shaki main mohabbat mein raha

shikwa-e-charKH na tha kuchh gila-e-yar na tha

hashr ke roz mere husn-e-gunah ka yarab

teri rahmat ke siwa koi KHaridar na tha

teri aankhon ki mohabbat ka faqat tha use rog

warna kuchh nargis-e-bimar ko aazar na tha

tum ne mahfil mein jagah di use hasrat hai mujhe

ghair is aaw-bhagat ka to saza-war na tha

nargis us aankh ki bimar-e-gul us ruKH pe nisar

bagh-e-alam mein kise ishq ka aazar na tha

ho gai rasm-e-mulaqat chalo bahs hai kya

tum KHata par na the aur main bhi wafadar na tha

do pyalon mein hai saqi ke ajab kaif 'fahim'

aankhen milte hi wo tha kaun jo sarshaar na tha