kyon KHafa rashk-e-hur hota hai

kyoñ ḳhafā rashk-e-hūr hotā hai

aadmī se qusūr hotā hai

mai-e-ulfat se phir gayā jo dil

sūrat-e-shīsha chuur hotā hai

ḳhāk-e-āshiq se jo daraḳht ugā

tuur hotā hai nuur hotā hai

jis ko dekhā vo is zamāne meñ

apne nazdīk duur hotā hai

ḳhāksārī vo hai ki zarroñ par

roz bārān-e-nūr hotā hai

kis kī letā nahīñ ḳhabar ravāq

ālūdgī nā-subūr hotā hai

ai havas nān-e-dāġh bas na lagā

garm tūfāñ tanūr hotā hai

kashtī-e-mai nahīñ to ai saaqī

bahr-e-ġham se ubuur hotā hai

baaġh meñ jaao jaate ho jo 'nasīm'

sub.h ko vo zarūr hotā hai

kyon KHafa rashk-e-hur hota hai

aadmi se qusur hota hai

mai-e-ulfat se phir gaya jo dil

surat-e-shisha chur hota hai

KHak-e-ashiq se jo daraKHt uga

tur hota hai nur hota hai

jis ko dekha wo is zamane mein

apne nazdik dur hota hai

KHaksari wo hai ki zarron par

roz baran-e-nur hota hai

kis ki leta nahin KHabar rawaq

aaludgi na-subur hota hai

ai hawas nan-e-dagh bas na laga

garm tufan tanur hota hai

kashti-e-mai nahin to ai saqi

bahr-e-gham se ubur hota hai

bagh mein jao jate ho jo 'nasim'

subh ko wo zarur hota hai