kyon meri wahshaton ko tamasha kare koi

kyoñ merī vahshatoñ ko tamāsha kare koī

ā.īna maiñ nahīñ huuñ ki dekhā kare koī

har har nigāh us kī bayābāñ-navard hai

ik dasht apne dil meñ jo paidā kare koī

khiñch kar ab aa gayā hai nigāhoñ meñ soz-e-dil

fikr-e-naqāb āriz-e-zebā kare koī

ik zabt-e-be-mahal ne bharam dil kā rakh liyā

sau guunā hai jo aaj se naala kare koī

nādān kuchh to hotī hai taklīf hijr meñ

kuchh shauq to nahīñ hai ki royā kare koī

afsāna-e-kalīm pe īmān hai mirā

is shauq ko 'munīr' magar kyā kare koī

kyon meri wahshaton ko tamasha kare koi

aaina main nahin hun ki dekha kare koi

har har nigah us ki bayaban-naward hai

ek dasht apne dil mein jo paida kare koi

khinch kar ab aa gaya hai nigahon mein soz-e-dil

fikr-e-naqab aariz-e-zeba kare koi

ek zabt-e-be-mahal ne bharam dil ka rakh liya

sau guna hai jo aaj se nala kare koi

nadan kuchh to hoti hai taklif hijr mein

kuchh shauq to nahin hai ki roya kare koi

afsana-e-kalim pe iman hai mera

is shauq ko 'munir' magar kya kare koi