kyon na ai bedari-e-ehsas tujhse Dar lage

kyoñ na ai bedārī-e-ehsās tujh se Dar lage

jab kisī kā sar qalam ho mujh ko apnā sar lage

chehra chehra DhūñDhtā huuñ shādmānī kī dalīl

jaane kyoñ har shaḳhs mujh ko ġham kā paiġhambar lage

reza reza chun rahā huuñ āñsuoñ kī chhāñv meñ

dil ke ā.īne pe kitne vaqt ke patthar lage

lamha lamha chāTtī hai dil ke zaḳhmoñ kā lahū

phir bhī zālim mujh ko tanhā.ī baḌī dilbar lage

jin ko maanī ne kabhī chhūne kī jur.at bhī na kī

ahd-e-hāzir meñ hamāre haath vo patthar lage

tab kahīñ marbūt mutrib dil kā afsāna huā

ban ke jab paivand mere dard ke manzar lage

kyon na ai bedari-e-ehsas tujh se Dar lage

jab kisi ka sar qalam ho mujh ko apna sar lage

chehra chehra DhunDhta hun shadmani ki dalil

jaane kyon har shaKHs mujh ko gham ka paighambar lage

reza reza chun raha hun aansuon ki chhanw mein

dil ke aaine pe kitne waqt ke patthar lage

lamha lamha chaTti hai dil ke zaKHmon ka lahu

phir bhi zalim mujh ko tanhai baDi dilbar lage

jin ko mani ne kabhi chhune ki jurat bhi na ki

ahd-e-hazir mein hamare hath wo patthar lage

tab kahin marbut mutrib dil ka afsana hua

ban ke jab paiwand mere dard ke manzar lage