kyon na hum aaj haqiqat hi bata den apni

kyoñ na ham aaj haqīqat hī batā deñ apnī

jism apnā hī na is jism meñ sāñseñ apnī

sach to ye hai ki kabhī ḳhud ko talāshā hī na thā

aur aa.ī bhī na thiiñ barsoñ se yādeñ apnī

bojh is dil kā kisī roz to halkā hogā

khul ke barseñgī kisī roz to āñkheñ apnī

ab ye aalam hai ham ik duuje ko sun lete haiñ

aur ḳhāmosh bhī rakhte haiñ zabāneñ apnī

jaane kis vaqt ho andar ke safar kā āġhāz

jaane kab ḳhatm hoñ bāhar kī ye dauḌeñ apnī

mujh ko pahle hī se irfān kā hai nashsha bahut

mere aage se haTā lo ye sharābeñ apnī

ab to har samt nazar aatā hai jalva apnā

ab to jis samt bhī uThtī haiñ nigāheñ apnī

aa.ina aa.ina hai aap ko kyā dekhegā

dekh saktī haiñ kahāñ ḳhud ko nigāheñ apnī

ruuh kī pyaas hai lafzoñ se kahāñ bujhtī hai

band kar do ye sahīfe ye kitābeñ apnī

ek tū hī to samajh saktā hai 'āsī' varna

kaun samjhegā tire shahr meñ bāteñ apnī

kyon na hum aaj haqiqat hi bata den apni

jism apna hi na is jism mein sansen apni

sach to ye hai ki kabhi KHud ko talasha hi na tha

aur aai bhi na thin barson se yaaden apni

bojh is dil ka kisi roz to halka hoga

khul ke barsengi kisi roz to aankhen apni

ab ye aalam hai hum ek duje ko sun lete hain

aur KHamosh bhi rakhte hain zabanen apni

jaane kis waqt ho andar ke safar ka aaghaz

jaane kab KHatm hon bahar ki ye dauDen apni

mujh ko pahle hi se irfan ka hai nashsha bahut

mere aage se haTa lo ye sharaben apni

ab to har samt nazar aata hai jalwa apna

ab to jis samt bhi uThti hain nigahen apni

aaina aaina hai aap ko kya dekhega

dekh sakti hain kahan KHud ko nigahen apni

ruh ki pyas hai lafzon se kahan bujhti hai

band kar do ye sahife ye kitaben apni

ek tu hi to samajh sakta hai 'asi' warna

kaun samjhega tere shahr mein baaten apni