kyon na ho mujhse siyah-baKHt ke tan mein suraj

kyoñ na ho mujh se siyah-baḳht ke tan meñ sūraj

terī zulfoñ meñ hai shab gore badan meñ sūraj

gar sar-e-shām vo mah-ruḳh pa.e-gul-gasht aa.e

jāte-jāte bhī palaT aa.e chaman meñ sūraj

chāñd-tāroñ kā to kyā zikr hai ai māh-jabīñ

tere āñchal kī hai ek ek kiran meñ sūraj

aarsī us ne jo sharmā ke laboñ pe rakh lī

maiñ ye samjhā ki dahaktā hai dahan meñ sūraj

zer-e-āñchal vo tirā gorā badan thā zālim

yā shab-e-vasl meñ aaya thā gahan meñ sūraj

vasl kī shab tirī choTī meñ jo bunda uljhā

rāt-bhar chamkā kiyā saañp ke phan meñ sūraj

qabr meñ hove na taklīf farishtoñ ko 'asar'

bā'd-e-murdan koī rakh diijo kafan meñ sūraj

kyon na ho mujh se siyah-baKHt ke tan mein suraj

teri zulfon mein hai shab gore badan mein suraj

gar sar-e-sham wo mah-ruKH pae-gul-gasht aae

jate-jate bhi palaT aae chaman mein suraj

chand-taron ka to kya zikr hai ai mah-jabin

tere aanchal ki hai ek ek kiran mein suraj

aarsi us ne jo sharma ke labon pe rakh li

main ye samjha ki dahakta hai dahan mein suraj

zer-e-anchal wo tera gora badan tha zalim

ya shab-e-wasl mein aaya tha gahan mein suraj

wasl ki shab teri choTi mein jo bunda uljha

raat-bhar chamka kiya sanp ke phan mein suraj

qabr mein howe na taklif farishton ko 'asar'

ba'd-e-murdan koi rakh dijo kafan mein suraj